Jhk成立到而家已經過咗一年半，回顧番呢段時間入面，我哋試過用唔同嘅方式去實行我哋嘅三個理念。組織集會示威，喺英國反共產黨嘅滲透，同埋幫助香港人融入英國社會。 單獨睇每一次嘅活動都係算成功，但係總括嚟講有冇實行到我哋呢三個理念，我平心而論只係可以算得上強差人意。可以話我哋成立左嘅時間唔算好長，喺所有成員都唔係全職嘅情況之下，只係利用我哋自己嘅工餘時間，去盡自己嘅所能為香港人付出。可以行到呢一步，已經差唔多係盡左我哋嘅最大努力。 到咗今時今日我仲繼續，係因為我對香港呢個地方始終好有感情，雖然我離開咗好耐。我當然好希望可以返返去一個我有感情牽絆嘅地方，但係我都好明白呢個係冇可能，就算返到去都唔會係以前嘅香港。 我唯有退而求其次希望可以將呢一個族群嘅連繫，同埋感覺係英國延續落去。但係睇嚟就嚟呢一樣嘢都唔係咁容易。因為如果當普遍香港人都唔認為有呢個需要，或者冇一個正確嘅覺悟，知道要付出啲乜嘢而願意去付出嘅話，憑我自己一個人，我嘅願望係冇可能達成。 而我亦都一個對香港人了解唔算深，到咗而家亦都算叫做有相對嘅認識同了解。好現實咁講，而家普遍香港族群喺英國嘅能力同埋決心，係唔足以有一番作為。亦都唔足以係英國社會入面，貢獻到啲乜嘢去抵抗共產黨。如果情況冇改善嘅話，甚至連維持自己嘅身份認同亦都有困難。 我曾經講過一九年嘅運動究竟有冇意義，好大程度係在乎於以後嘅人，可唔可以延續到佢哋嘅信念，繼承到佢哋留低嘅嘢。如果香港民族嘅命運只可以係咁，就算有幾唔甘心都好，都只可以接受。所有人付出咗嘅血汗，犧牲咗嘅嘢，承受嘅創傷，再過多幾十年或者幾代之後，終有一日會撫平。 人大咗就會知道就算幾努力，或者自己能力幾強都好都係有極限。我睇到而家成個香港族群嘅趨勢，同埋每普遍香港人嘅態度，如果冇一個根本上嘅變化，如果呢個民族集體選擇唔去改變劣根性，我知道憑我呢一個人，同呢個組織係唔會有能力回天。 每個人都有自己要考慮嘅地方，要為自己做嘅決定負責任。我喺度寫呢啲嘢，唔係話要怪責任何人，因為怪責係冇意思。我只係想講出一個事實就係呢一刻嚟到英國嘅香港人，佢哋唔會再受到共產黨嘅打壓，佢哋幾乎可以有最大嘅空間做佢哋，所謂初心驅使佢哋應該要做嘅事，但亦都有好多藉口唔再去做再唔去做任何嘢。 我非常感謝咁多位曾經幫過手，同埋而家仲係幫個幫緊手嘅成員。多謝你哋陪住我一齊去實踐呢幾個理念，好感激係今時今日有香港人願意為咗一啲相對虛無飄渺嘅理想信念去付出。 每一次有人因為各種各樣嘅原因、理由、藉口、要離開嘅時候，或者交唔足嘢，要我去執手尾嘅時候，我就會諗起一首達明一派嘅歌，十個救火的少年。希望香港民族唔會重複原地踏步，冇進步，唔會好似呢一首咁舊嘅歌一樣。 今年六月社運旺季，暖氣軍師決定唔會搞任何活動，一部份係因為知道已經有太多活動有第二啲組織去搞。一方面亦都想睇吓除咗暖氣軍師，喺英國嘅會繼續有香港人挺身發揮創意力，實踐民主運動嘅唔同可能性。 有一部份嘅事實已經浮左上水面，喺英國嘅好多香港人或者華人反共組織已經被滲透。如果香港人唔好似19年咁每個人都行多一步，親身支持依然有心為香港人爭取民主自由活動，喺英國嘅社運只會從一小群搞手中殆盡心力而泡沫化消失，民主運動原地踏步。至於有邊啲組織係毋忘初心，就要靠大家自己發掘下，呢個亦都係獨立思考嘅其中一步。 我哋暖氣軍師嘅宗旨除咗凝聚香港人族群之外，亦都希望提升香港人普遍嘅水準，成為一個橋樑可以連結到英國本地嘅人。我哋抗拒重複泛民喺香港，30幾年以來嘅抗爭模式。佢哋喺香港咁耐以來未能成功，將佢哋個套搬到嚟英國之後更加唔會成功。 講咗咁多放負嘢,係為咗希望大家知道個形勢幾咁嚴峻。因為了解做呢個世界係幾咁絕望之後,先至有可能搵到希望。一九年嘅時候有一句嘢就係唔係有希望先至去做,而係喺做左先至有希望。 大家如果想搵到希望,歡迎加入JHK。我哋一齊努力! Terry P.S. 以個人層面來講，每一個人其實都有好多嘢係可以做嘅，唔需要依賴大台，任何組織去帶領。詳細請睇以下連結： https://t.me/BoilerTacticians/694 ——————————————— Facebook l Telegram l Telegram channel l Instagram l Twitter l MeWe #london #hongkongers #fightforfreedom #standwithhk #freehongkong #hongkong #hkisnotchina #liberatehongkong #revolutionofourtimes #英國戰線 #海外戰線 #英港同行 #暖氣軍師 #justitiahk 266 views百命藏麟, 11:30
