2022-02-27 20:41:50
#Ukraine #Russia #Politics #war #military
點樣follow烏克蘭？
事態發展之快，小編都已經唔知可以點share新聞。比起睇呢個channel，Twitter/TG 有更多更快更有用嘅資訊，所以小編係上面幾個po推薦唔少channel / page比大家，希望大家多啲follow留守烏克蘭報導嘅記者、較專業嘅分析同有較高公信力嘅公眾人物，黎緊小編會再整合下有關資料
小編平時淨係夠膽做簡單翻譯，因為唔識嘅實在太多，評論只會講多錯多。但呢幾日觀察網上嘅言論同反應，小編想大膽啲同大家分享一啲睇法：
1. 當事態發展得咁快，我地點追新聞？
就係唔好跟得咁貼同睇咁多（利申：小編未做到）：因為我地睇嘅都係好零碎嘅資料/圖/片，尤其我地大部分人都唔係研究軍事戰略等嘅專業人士，呢啲留翻比佢地分析同解釋，我地再學
普京做乜無啦啦 all-in 咁打烏克蘭？好似中學讀歷史咁，先知多啲背景資料會更加明白有咩因素引致今日嘅戰爭。唔想睇咁多字嘅話，我推薦睇 Visual Capitalist 圖文並茂嘅介紹：
睇地圖認識烏克蘭：Map Explainer: Key Facts About Ukraine
呢篇介紹烏克蘭地勢、人口、經濟、近年衝突
四幅地圖介紹蘇聯：4 Historical Maps that Explain the USSR
呢篇介紹由1930年代到蘇聯解體嘅變化
當我地睇太多資訊又消化唔到，就翻去研究 / 睇書 / 睇文，知多啲背景、歷史框架等，幫你容易啲理解普京點解咁癲
2. 北約同歐盟唔好再廢啲 / 拜登政府真係無能 / 如果係Trump在位普京肯定唔敢打 ......
望住烏克蘭死傷人數越黎越多，歐盟傾三日先肯踢俄羅斯出SWIFT同送武器，小編第一下反應都係：eh 可以再早啲囉。一時情緒發洩下梗係無問題，但一場戰爭背後肯定有千千萬萬嘅因素引致
你可能心諗：而家打緊仗啊，仲講XYZ。係啊，我地人在香港除咗捐錢捐物資，仲可以做嘅就係趁今次學習世界秩序究竟點運作，真。認識國際線
例如歐盟決定慢，可能同佢地二戰陰影有關（尤其德國意大利）。話拜登政府廢，其實今次烏克蘭軍隊可以精準射落唔少飛機同武器，背後肯定唔少得美國情報（當然未必擺上台比大家睇），而早排美國係咁吹雞話會打個陣無人附和（當然背後情報機關有做咩我地唔知）。Trump講啱北約無能同歐盟依賴俄羅斯能源，但2020年因為烏克蘭唔交拜登黑材料，共和黨參議員幾乎全數否決賣重要武器比烏克蘭，當時得羅姆尼反對咁做。再追落去，Obama年代已經話北約係free rider，叫歐洲多啲參與而唔係齋靠美國。至於烏克蘭對西方觀感，其實要去到14年中間嘅民調先明顯見到，支持入北約嘅人多過反對，東烏支持入歐盟比率亦相對比西烏低
我地係香港嘅經歷同對中共嘅認知，西方民主國家嘅人無親身感受係唔會明，正如我地唔會明白而家烏克蘭人所受嘅折磨，所以話西方反應遲鈍，可以同歷史背景、民族、個人以至社會經歷有關。每個國家背後做決定嘅同你同我一樣都係人，係一場戰爭做決定牽連嘅係無數人命甚至未來世界秩序，佢地唔願意係短時間做決定，你可以話係唔夠勇氣冒險，但一日場仗仲有變化，就要睇埋落去先判斷到佢地錯咩啱咩
3. 咁講法，仲睇新聞黎做乜
社交媒體同新聞見到嘅戰爭多數係數字、暴力或者悲慘嘅影像，但我地唔會見到每個人背後嘅故事，唔會理解戰爭究竟有幾殘酷。睇新聞除咗覺得好慘好慘，可以反思當我地直視他人苦難嘅時候可以做咩，包括繼續聲援同聯繫烏克蘭人，就好似當初搞國際線，就算面對強大國家機器，我地知道外面仲有好多人支持我地嘅時候，會更有力量面對苦難
除咗出錢、關注局勢、做國際線文宣、睇書......我地仲可以做咩？
普京可能無預到烏克蘭人可以咁勇撐咁耐、四日可以團結北約同歐盟、比較友好嘅東歐國家唔撐居多、德國一改多年溫和free rider形象、一黎就話投資千億歐元 / 超過2% GDP落國防預算、俄羅斯同白羅斯有咁多人走出黎示威...... 我地仲可以做咩？小編樂觀啲，放長雙眼等睇普京呢啲癲佬下場！
#StandWithUkraine
2.6K views17:41
寶
