【魚革義士來鴻】
2016年魚蛋革命發生超過5年，不過至今仍然有義士被控暴動等不同罪名和入獄。
去年底被判暴動罪成入獄3年的大耳，被囚數月後寫信到本平台，除了訴說自己的近況外，還希望與同道們成為筆友，談天說地，分享生活，於在囚的日子中成為心靈支柱。
//To 星火：
Sup Guys！我係一位16年魚蛋被捕而入獄嘅香港人。我諗各位都應該對我未有認識。所以我先自我介紹一下。小弟今年廿四歲，係一名無名音樂人（自稱XD）主要係玩hip-hop, RnB, 電子音樂為主。唔知大家會唔會聽過我嘅作品，如果唔厭棄可以係音樂平台上搵”Lil $aiyan”。應該就可以搵到我過往嘅作品聽下。(可能未必啱大家口味，多多包容)喺黎依度之前我生活都係圍繞住音樂同玩。估唔到入到黎之後竟然開發到一樣以前一定唔會做嘅事，就係哲學。喺一次偶然嘅情況下我睇到一本哲學書《被討厭的勇氣》。雖然唔係一本正式嘅哲學書，但就喺嗰一刻，我開始對哲學依樣野產生左興趣。本來睇到書一定想瞓嘅我竟然對哲學依樣看似沉悶嘅野有興趣？講出黎我自己都唔信。但確實係咁發生左依件0.01%會發生嘅事。睇黎某人話”坐監會令人生更加精彩” 可能係真事，哈哈。
另外，我仲染上一種癮。就係健身癮。本身依件事係我好耐以前定立嘅目標，一直都好想嘗試下有腹肌嘅感覺。但對於我依種多肉動物黎講，係出面咁自由嘅生活中，永遠抵擋唔住誘惑同敵不過懶惰（好失敗）。可能喺依度真係太悶，見到其他人喺度操野，自己無所事事，喺好奇下跟住做左第一次。有一就有二，慢慢就成為左習慣到依家無時無刻都想郁下，唔郁唔舒服。但要講到最吸引我，令我上癮嘅原因係，只係一個月我就見到有改變。由我入黎時93KG變到四個月後嘅83KG（Me 180cm）。個種開心我無辦法用文字表達。雖然仲離目標好遠。但我相信無咩係做唔到嘅。
其實呢，今次依封信，我最主要係想拜託星火可否幫我搵一啲筆友，傾下音樂，談下天說下地。討論下哲學，請教下健身心得。如果各位願意同小弟做筆友的話，希望你地可以寫信俾我啦 ＞＜，感謝！最後願所有香港人平安、健康、幸福、快樂、多喝水、多運動，保重身體。
大耳//
全文如下：
https://www.facebook.com/sparkalliancehk/photos/a.1989972677956521/3031597570460688/?type=3
