2019年6月12日開始，香港發生左可以係歷史留名既事，唔知十年後， | 老豆搵仔

2019年6月12日開始，香港發生左可以係歷史留名既事，唔知十年後，廿年後，我地會唔會比人改寫到遺臭萬年，所以我每隔一陣都會打篇文比人睇，比自己睇，可以留個record比自己。

當初我係一個政治冷感既人，係一隻港豬，到依家可能有所改變，但唔代表依家既我鐘意政治，我同過好多人講，我出去其實個原因係好單純，即使自己未有下一代，都想出去保護下人地既下一代，或者想自己既下一代，唔洗受苦，當然啦，如果睇依篇文既你，覺得大陸既一切係美好既話，勸你唔好睇落去。

直到2019年7月21日，我先決定要行出黎，唔係因為名，利，權，我當時出黎，都無諗住贏到，因為理性話我知，如果用一個打既角度黎睇香港場運動，其實係唔會贏到，成日有人話200萬人上街遊行，200萬個手無寸鐵既人去對付3萬個差佬，同200萬個bb仔打3萬個大人係無分別。但係咪真係無希望就咩都唔做？可能我一直以黎睇左好多動畫，小說，搞到我個人on99咁，明知輸硬都要出去，亦都有好多人講打黎輸硬，出去打黎有咩意思，如果有人講過啲咁既野既話，我想問其實你見到啲學生比人打到仆街，你個良心真係過意得去咩？每個人既底線都唔同，可能你同我講，我都要生活架，係咪因為生活所以你就要屈服？你地得，可能好多人都得，但我就係咁撚on9，因為我唔撚得。

結果我就係咁，行左出黎，本身我自己都唔係一個良好市民，我覺得我依啲人，更加應該行出黎，因為經歷左咁多野，我唔想淨係為左老左兒孫滿堂既時候係度同佢地想當年。

係我出左黎之後，一如既往我都吸引左好多新既人係我身邊，當時我創立左一隊人，叫屠龍，由我地出去，到出名，再去到分隊，直到我地團滅，中間發生左好多好多既事，有笑，有血，有淚，我唔知其他所謂既手足，出去既原因係咩，但至少我知道，我隊友，大部分都係同我一樣，係因為睇唔過眼，就算自己幾唔想出，身體都會控制唔住。

當時既我，真係無考慮太多政治因素，我曾經都有懷疑過自己，做既野係咪真係岩，直到我地全隊團滅左之後，好多人問我有冇後悔，其實我比人拉左果下，我真係一啲後悔都無，仲係度，入到去可以讀我一直得把口講想讀既英文，點知又一次比我走左。直到依家我仲有隊友係香港坐緊監，由暴動，串謀嚴重傷人，改做意圖謀殺，進行恐怖活動，中共已經定性左我地依隊人為恐怖分子，我唔知真正既恐怖分子係點，可能我地做既野同思想都有重疊，但其實係咪就代表我地做緊既野就係錯？我地爭取自由，爭取民主，究竟我做錯啲咩？點解我地全部人同屋企人都要分隔開晒，各自生活？

講左咁撚多廢話，我就係想講，我無為自己做既任何事去後悔之前無，今日無，之後都唔會，就算有，後悔都只係點解當初無做好啲，無做多啲。

今日6月12日，希望終有一年既6月12日我可以番去真正屬於我自己既家。願我所有兄弟姊妹都可以捱得過依關。

光復香港，時代革命
願榮光歸香港

By Edward