八號信號仍然生效 MET WARN預料下午4至7時期間較大機會改發三號信號
各位早晨！現時八號東北烈風或暴風信號仍然生效，外面風大雨大，大家要留喺安全地方呀！
MET WARN最新預測下午4至7時期間較大機會改發三號強風信號。凌晨圓規嘅路徑稍為比預期北以及增強為颱風，同時圓規北面嘅烈風圈半徑保持喺約445公里。圓規已經開始遠離香港，預計下晝香港會脫離佢嘅烈風圈，烈風威脅逐漸解除。天文台最新表示，八號信號會喺下晝4點前維持。而從九天天氣預測可見，天文台預測今晚風勢先會緩和至廣泛強風程度，換言之天文台預測香港風勢會喺今晚先減弱到三號信號嘅程度。
MET WARN之所以無法預測改發三號信號嘅確切時間，係因為圓規嘅移動速度、當時有無狂風驟雨帶影響香港、業務運作考慮等等，都會影響對落波時間嘅判斷。當有任何因素出現變化而令預測有變，MET WARN會盡快更新資訊。
天氣方面，凌晨起本港已逐漸轉吹東至東北風，令原先受屏蔽嘅地方變得當風，大部分氣象站嘅風力喺凌晨都有所上升。今日會持續有狂風驟雨。凌晨天文潮高峰加上風暴潮，鰂魚涌嘅水位一度上升至海圖基準面以上約3.4米，沙田城門河兩旁、小西灣等低窪地方嚴重水浸，多處打破10月嘅水位或風暴潮紀錄。海面繼續有大浪同湧浪，切記應停止所有水上活動。
MET WARN會繼續密切留意圓規嘅動向，並喺有需要時更新天氣或風球資訊。
