【不打疫苗就強檢？醫管局可唔可以有少少醫學常識】
醫管局準備由下個月10號起要求全港6.5萬個前線員工每個星期進行武漢肺炎檢測，並已經透過「防疫快訊」通知同事。不過，如果打咗疫苗嘅同事就獲特赦唔駛測。
喂大佬呀，高層可唔可以唔好咁癲呀？同事唔想做定期檢測？唔係唔得，但有會員話上司會好積極好進取咁關心原因係乜，甚至叫同事直接向佢上司嘅上司解釋等等。但那邊廂又話打咗針就可以豁免，高層做法明顯係想用一星期一次檢測（附加無窮關心予唔想參與檢測嘅同事）煩爆前線同事，逼唔想煩嘅同事去打疫苗。
作為醫護，定期檢測本身無傷大雅，但當然資源唔一定要咁用，尤其現時疫情已緩和，甚至同事接種疫苗其實都唔係壞事。但係問題在於醫管局夾硬將兩者放係對立面。即使疫苗有效率高如復必泰(BioNtech)都唔係百分百有效，更加唔駛講科興有效率只係得50.7%。喺有漏網之魚嘅情況下，檢測同打疫苗根本冇可能係二選其一就包保冇事。
本會早前已經就政府新一輪防疫措施所提供「誘因」提出過批評，指出政府以打疫苗取代檢測係製造虛假嘅安全感，隨時引致疫情再爆發。估唔到相隔無耐，醫管局馬上跟風做政府應聲蟲，妄顧作為醫護最基本嘅醫學常識。
醫管局唔講醫學都唔係今日嘅事。想當日即使多間醫院爆發院內感染，醫管局都冇要求全體同事定期檢測。而家疫情緩和，醫管局反而強推定期檢測。原因擺明就唔係為咗防疫，而係逼同事喺「檢測」、「打疫苗」之中揀一個，等於威逼同事打疫苗 ─ 唔想一星期檢測一次？打疫苗啦！唔想煩？打疫苗啦！
好心啦，成班高層，比返啲常識啦，又俾人話「政治凌駕專業」喇高醫生！
