2021-04-14 06:23:30
【Winnie家書－記於復活節假期】
致各位香港人：
大家好嗎？被還押已經超過一個月，我已經逐漸適應緊牆內嘅生活，但係我都會不斷提醒自己唔好習慣。能夠適應唔等於要習慣，唔好成為只係得吃、喝、工作、瞓覺嘅人，唔好成為失去自我思考嘅人。
透過工會嘅幫助，我收到嚟自各方嘅鼓勵同埋打氣，有啲更加係嚟自居於海外嘅香港人，其中包括來自中學校長嘅信件，實在令我大為感動。
另外喺眾多嘅來信當中，有一封係來自一位老師，都令我印象好深刻，好想同大家分享：信入便講到一間學校突然間要求老師進行武肺檢測，起初大家都敢怒不敢言，但係其中一位老師突然鼓起勇氣，喺WhatsApp group入邊提問：「學校是否要強制檢測了？」管理層當堂不知所措，唔識反應，第二日學校就取消咗個無理要求。來信者嘅分享，或者係佢感受到我哋嘅勇氣，面對不公義之事理應反抗。
呢樣野都令我諗起早前同工會理事嘅對談。嗰時我覺得工會應該係資源不足嘅時候擺少啲街站，保留多啲時間去處理其他事務，但其他理事就覺得，擺街站係最直接接觸到會員嘅機會，亦都係面對面嘅溝通，可以令到人哋感受到你嘅真誠，最易觸及人心。即使係一位會員都好，呢個亦都係一個理念得以傳承嘅機會，老師嘅來信正正係證明咗呢一個講法。縱使徒勞無功，我哋都唔可以無動於衷。更何況我哋嘅行動係唔會白費嘅。
今日4月6號係五日假期嘅最後一日，大家都可能趁着假期出街玩， 我睇報紙嘅時候知道好多離島、泳灘都擠滿晒人群。留喺屋企嘅可能就喺度睇YouTube、Netflix消磨時間；至於喺牆內我就靠平日收到嘅回信，寫吓信、睇吓電視（大部份嘅囚友都鍾意睇CCTVB）我都有聽收音機，主要聽歌嚟打發時間。好好彩已經過咗一個月，可以入多幾本新書，好彩已經過咗一個月我哋可以入多幾本新書。我老公好為我著想㗎，上個月仲幫我入咗幾本n年前喺書展買嘅英文小說，本身啲書就喺屋企鋪塵咗n年，但我最後用咗唔夠一個月時間食晒成本書。
諗諗吓都覺得幾諷刺，以前有好多會務、好多物質，令我讀書速度極度緩慢，但係而家喺牆內我就渴望不斷睇多啲新書。
我依家睇緊嘅係〈台灣最好的時刻〉，可能會有人覺得「吓，又係呢本書啊？」但係呢本係工會之前搞讀書會嘅其中一本書，對我嚟講好有意義，佢曾經連結左我同數十位會員。我哋一齊探討台灣社會當時對香港嘅影響，一齊探討當時嘅台灣有冇值得借鏡嘅地方，甚至講到點樣睇香港嘅選舉，不過宜家講咩都好似冇咩意義。
睇到〈法庭是另一個戰場〉嘅章節，令我諗咗好多嘢。係1月6號之前我都只係睇咗呢本書嘅一半，確實當時只係將台灣當係一段民主化嘅歷史，無咩特別大嘅感覺。但係當自己經歷咗1.06、2.28 之後，或多或少都有將段歷史投射喺自己身上：被極權壓迫、未審先囚、無證據、無理嘅指控等等，就好似經歷緊美麗島大審判一樣。
我自知無姚嘉文等人嘅辯才，但係都認同呢次審訊係理應展現自己嘅氣度同埋理念。「活在真實中」「假裝生活一切如常」系工會一直希望帶俾大家嘅信息。雖然我已經辭退左工會主席一職，但係我好相信理事們會肩負起我哋一齊成立工會嘅初衷，同大家一齊砥礪前行。
因為我哋唔單只係醫管局員工，我哋更加係香港人。
余慧明
2021/4/6
2.4K views03:23
醫
