【你搣得走我公務員嘅身份 但搣唔走我香港人嘅身份】
諗起新公務員工會，就會諗起顏武周先生喺前年舉辦「公僕仝人，與民同行」集會時嘅呢段發言。
今日新公解散，係可惜，亦慶幸，有人就算面對困境，都可以自豪地講自己冇被世界改變到自己。但倒返轉諗，我哋可唔可以為世界帶嚟一啲「改變」呢？
「公司發現我係工會會員嘅話，可能會對我不利」，我諗作為打工仔嘅大家都會有類似嘅擔心。
都係果句，如果大家有留意前年冇不反嘅遊行，諗下點解有咁多人會夠膽去一個犯法、高危、會比人拉嘅遊行呢？
就係因為夠人多、又夠膽企出黎，咁大家都有種感覺「咁多人唔驚啦」。大家都明白，一齊企出黎就已經係保護緊大家。
當然，係職場層面大家有「份工」呢個春袋比人揸住。同公司反面嘅話，利益得失好直接，被清數嘅風險亦好高，而且有人會認住你，你想轉工都會搞鳩你。
所以驚係正常，驚唔係值得羞恥、令人泄氣嘅事。
反而我地要諗下喺「驚」嘅同時，點樣又可以喺有限度嘅空間下「做到啲野」。公司裡面又好；限聚令下又好；國安法下又好，其實仲有好大嘅空間抗爭。
而所謂嘅抗爭，唔一定係有火光、有血淚、有畫面。可能係細微細眼、做左都唔多覺，但你又會覺得有啲野改變緊。舉幾個例：
有酒店同事個位仲貼緊上年派嘅工會揮春；
有高層會share工會post比下屬睇；
有酒店做仆街野會經工會傳到街知巷聞；
有任何酒店新聞，傳媒都會搵工會，問下作為員工嘅意見；
有會員已經唔係酒店做，都會想續會做脫產會員，只係想話比人知佢仲係工會嘅成員，想繼續為工會出力。
以上嘅野完全唔顯眼，但最重要嘅係，我哋見到：
一啲唔起眼嘅行為，係會「改變」到一啲野。
而呢個「改變」，就已經係抗爭嘅一部分。每一個人嘅小小改變，就足以憾動一整個社群，甚至係打破一啲大家以前覺得係「常識」嘅規則。
有部門可以永遠準時收工；
有部門可以永遠食下午茶；
有部門可以永遠都要落場；
有部門可以永遠都唔補鐘。
當大家都覺得係「常識」，大家就會覺得好難改變、冇得改變。
同樣道理：
依家市道咁差就緊係要npl啦；
依家市道咁差就緊係要減薪啦；
依家市道咁差就緊係冇bonus啦；
依家市道咁差就緊係要裁員啦。
呢一套「常識」大家又想唔想接受呢？如果唔想，我哋又可以做出咩野小小「改變」去打破呢個常識呢？
係難諗架喇，係痛苦架喇。因為過去有得避嘅野，依家冇得再避喇，但好彩嘅係，你仲有得揀：
你解決問題，或者被問題解決你。
