#admin專欄 #你想梁天琦出獄見到嘅香港係點嘅樣？ @windseasonbro | 香港人Secrets

#admin專欄 #你想梁天琦出獄見到嘅香港係點嘅樣？ @windseasonbro

我一直避免寫天琦，一來怕情感勒索大家，二來當大家對天琦嘅期望大，會係佢嘅包袱，佢付出嘅已經夠多，無佢，唔會有「光復香港時代革命」。

「如果佢出獄，見到香港變成咁會點呢？」呢個諗法，由19年6月9竟然有百萬遊行，612反抗，615梁凌杰烈士，616二百萬大遊行...71黑區旗衝入立會...721第一次大部分人嗌光時，連儂牆...85罷工...831，新屋嶺，到大三罷，機場鄧寇克大行動...國際線，到1001...中大之戰，1111黎明行動...陳彥霖周梓樂，理大之戰或者香港人自殺爆眼中槍被姦死傷送中黃圈形成等等等等數之不盡嘅畫面(如有遺漏請勿介意，篇幅所限)，到武漢肺炎，到而家，我都仍然間唔中問呢個如果。

呢排令我諗：「如果天琦出獄，見到香港變成咁會點呢？」係因為香港人批鬥香港人，批鬥Mirror Error，批鬥黃店，黃圈崩壞，主因係大家都唔夠Humble。

香港人，除咗Be Water之外，Be humble都係之前我哋所強調嘅特質，我知道天琦反對教條主義，但我哋2019年咁和勇不分，其實真係出於互助互諒。

我知道大部分勇仔反對黃圈，佢哋會認為有黃店食人血饅頭，無幫助過手足，有人甚至話唐記同金栱門有餐券食，而黃店只係賺人血饅頭。

但其實，抗爭初期都係靠家長不停地購買藍店嘅餐券(因為每一區都有，方便)，如果要否定黃圈嘅付出未免不近人情。

我明白勇仔付出好多好多，亦明白佢哋不滿黃絲家長查家宅式審查然後只幫到少少，最後要流亡海外但香港人無直接幫到佢哋，但要完全否定香港人嘅付出同努力，只會令有心人洩氣。

八五罷工，有黃店第一時間表態，我明白而家大家標準高咗，認為表態唔係付出，但有黃店的確有養過/養緊勇仔，亦有自掏荷包出錢出力嘅黃老闆，我明白呢個圈有老鼠屎，但可唔可以應承我唔好鬥黃？

黃店，並唔係難食嘅藉口，我亦希望不同黃店可以努力改善下。

講返正題，各位知唔知道天琦係因為2016年2月8號魚蛋革命而被捕入獄？當時130人傷，當中包括90警，5記者，35個其他人(手足或途人？)

如果以而家大家屌Mirror Error為藍圈做嘢嘅理由嚟理解，咁係唔係可以屌天琦本民前魚蛋革命係用黃嘅手足嚟撐福建幫/新移民/黑社會為主嘅小販？

咁係唔係代表天琦係藍？本民前係藍？

有d嘢係超越黃藍，例如香港嘅本土價值或者係娛樂事業如Mirror Error，咁點解要反陳單春唔反姜濤？

單春已經代表唔到當下嘅「香港」，姜B 2019年係老銅定唔知邊度被狗查身份證。

姜濤演唱會大嗌香港加油，係見到佢真性情，其他親中藝人就有親中嘅真性情。

Mirror Error代表嘅價值，係香港人嘅潮流文化，呢樣嘢已經好寶貴，超越黃藍。

你想天琦出返嚟嘅時候見到嘅係點嘅香港？

係香港人互相反面嘅香港？定係槍口對外嘅香港？

我意思唔係要同藍聯合，而係黃營唔好分化。

吉野家美心陳小春楊明，香港人唔會亦唔應該原諒佢哋，當中係有道理，唔需要情感勒索食嘅就係賤人，而應該同你身邊朋友講點解香港人唔食。

我曾經幻想過，當天琦2022年1月出獄嘅時候，會引發2019年時代革命，結果時代革命竟然早咗兩年半發生，究竟係好事定壞事？

你想天琦出返嚟嘅時候見到嘅係點嘅香港？

#請廣傳