HongKong_IN 一周年
2020年5月11日 - 我哋諗咗個 brand name 叫做 "HongKong_IN" 喺IG 同 FB出咗第一個Post，當初就喺 D2 Place 租左個 booth 做寄賣，同時亦代表 HongKong_IN 正式由寄賣點開始成立。
呢一年由租一個寄賣點做寄賣，到國安法成立，然後就面對被打壓，我們仍然堅守住。到左8月份，店長因為被 D2 因為一啲佢哋所謂嘅理由被即日解雇，從而促成店長既加入 HongKong_IN。同時，大部份 HongKong_IN 寄賣嘅貨品被迫下架，同時認清所謂撐本土文化嘅機構原來一切都係為咗錢。
我哋籌備咗3個星期，直至9月份正式開左荔枝角既第一間，亦都係唯一一間既 studio。
11月，我哋有驚無險咁搞第一次市集 - 《香港人大笪地》，因為我哋太過新手，計劃唔夠周長，有人向食環投訴而被告吹，而我哋又好快捲土重來，搞咗《港嘢》。
11月4號，我哋嘅 IG 被 hack，冇咗近 6000 個 followers。
12月，搞左聖誕嘅 "被選中的細路" 活動。
2021年1月，搞咗黃金年糕套裝。
2月，做左《港嘢2.0 撐喜香港》私人年宵。
之後就經歷每一日都見紅既3~4月。
4月尾，我哋同Nerd Studio 創造咗《生於斯》私人市集。
店長：「回想呢一年行過嘅路，真的過得太唔容易。但幸好有相信我哋既品牌手足，同路人，甚至有啲有成為咗好兄弟既朋友仔。亦都同時要多謝一班係我哋身邊不離不棄既義工朋友仔 我亦多謝中佬願意放手任我去營運HongKong_IN，即使生意唔好蝕住咁做，但都無怪責而課金撐住。」
中佬：「HongKong_IN 得來不易，我哋當初就喺因為不屑大財團消費本土文化而退場，繼而膽粗粗開咗個小小 studio。店長同我會繼續堅持我哋嘅底線，不退不讓，莫忘初衷，堅守信念。」
黎緊既時間，我哋預視將會面對更難嘅營運環境，而我哋亦都將於8月尾約滿。到時會點行？唔知...前路真係未明，但仍會因為HongKong_IN 能有為大家發過聲，表態過，發洩過，等等而自豪。
將來日子，希望大家多多照顧。你哋願意一齊，齊上齊落嗎？
店長&中佬
2021年5月11日
Instagram: www.instagram.com/hongkonginbackup
