#謹代牆內手足轉載 各位好，我地係前T.N.T.X成員火鳥同相忘於江 | (葵涌邨)梁錦威資訊頻道

#謹代牆內手足轉載

各位好，我地係前T.N.T.X成員火鳥同相忘於江湖，今次我地代T.N.T.X其他前成員出呢篇聲明，向大家再次解釋我地停運嘅原因，而搞到T.N.T.X要停運嘅主角就係其中一位成員「果粒橙」同佢女朋友，利用牆內手足謀取私利所做成。

喺講事件經過之前，想先提一下T.N.T.X成立嘅目的同規矩，本來T.N.T.X成立嘅目的係希望幫助在囚手足，俾大家用支持手足嘅作品呢個形式，盡量減輕在囚手足嘅財務壓力，加入人數不限，而T.N.T.X嘅話事權係所有有份參與嘅「牆內手足」，決定任何事都由牆內手足投票決定。

講返正題，喺T.N.T.X成立時，本身搵左其中一位手足做admin，但果粒橙女友一直搶住想一齊做，最後雖然大家唔想，但喺冇辦法嘅情況下畀左果粒橙女友做admin，而原本個位手足就分左處理其他工作。但好快大家因為佢嘅人品同辦事能力低效而後悔，並投票決定搵到代替人物後就換admin，可惜喺畀佢做admin後就返唔到轉頭。

3個月前，我地搵到合適嘅人做admin，經再次投票通過後要求果粒橙女友交出admin權，但係佢竟然話唔畀，無視我哋嘅決定，而我地同果粒橙理論，得到嘅回應只係畀d時間佢處理，經多次理論得到嘅回應都係一樣，就咁就過左3個月，呢段時間我地用各種方法希望果粒橙女友交出admin權，但都冇用，而佢甚至一度用關閉T.N.T.X要脅我地，想我地唔好再叫佢交權，權力失衡都愈來愈嚴重，而佢地兩個就繼續發展挪用牆內手足名義 (T.N.T.X page) 賺錢嘅計劃。

果粒橙女友已經當左自己係話事人，否決曬我地所有嘅決定，例如加新人、畀我地知道金錢嘅情況、換人等通通否決，更嚴重係喺未經我地同意，用我地T.N.T.X同大家嘅名搵錢、收集物資、賣商品、甚至停運等，所有事都係果粒橙同佢女友自己決定並實行，我地全部人都係事後經出面嘅人通知先知有呢啲事，可見佢地嘅人品嚴重有問題。

所有收集到的物資 (包括200本書) 成員們一點也沒有收過，當大家在適當時候收唔到錢時，覺得條數有問題，用左2個月多次叫佢地交條數出黎睇，都係用各種理由唔畀，對一d手足黎講，其實呢d係救命錢。到我地發出最後通牒時，就出王現佢地畀人公開個人資料同自殺嘅鬧劇。係T.N.T.X嘅ig出自殺文，果粒橙喺呢件事後明確講明會強制自己女友交出admin權，當時冇人信過佢講嘅野，因為類似嘅說話佢已經講左好多次，而事實證明佢都係再一次滿口謊言，隨口講諗住拖時間，冇句真，而果粒橙女友係自殺鬧劇3日後復活，好似咩事都冇發生過咁，而到左呢一刻都係有八成成員未收到錢。

本身我地已經放棄，想向大家公告我地決定集體退出及其原因，放棄所有結束呢件事，但佢地潫未向我地交代任何一句嘅情況下私自結束T.N.T.X，我地要求佢地交代嘅賬目隨住del page從此死無對證。我地都覺得呢件事非常嚴重同過分，希望大家睇清楚呢兩個人，唔好再畀佢地呃同唔好畀佢地帶住可憐嘅光環離開，到最後啲錢到底點，係咪真係有問題我地無從查證，呢樣野就交由大家自行評價。

經過今次我地學到好多，吸收左今次嘅經驗，希望以後可以有機會用更好嘅姿態同大家分享作品。