#admin專欄 #風巴生活逸事 #一個個失去嘅Followers數字 @windseasonbro 睇到友台Admin感言，好多Channel已停止更新，好多香港人離棄睇TG Channel，風巴不勝唏噓。 我曾經都有呢種感覺，2019年，本Channel由千位數一路向上，到「頂點」約28xxx人，到而家175xx人，足足減少一萬個Followers，而Post平均嘅Read數由平均二千跌至百位數。 可能你哋睇到嘅只係數字，但對 Channel Admin嚟講，係抗爭熱度陰晴計，更加係支持度。 當然，我亦有反思自己好多位都做得唔夠好，Post太多，高質內容唔多；One Man Band好多時都做唔到好好嘅Factcheck，甚至有種濫發資訊嘅感覺，難免似Content Farm。 不過見到一個又一個曾經投稿，熟悉嘅手足，Followers嘅名字從Channel度消失，甚至變成了Deleted Account，從此之後同我無咗任何交集，心情係複雜同難以接受。 我係冷氣軍師，同各位互動嘅每一個清晨，午間，晚上；颱風前夕夜，颱風假；遊行，集會；2019時代革命，2020武漢肺炎......我都非常珍惜。 眼見抗爭踏入低潮，而我嘅tg channel又好，甚至大部分Tg Channels都按比例地流失Followers，作為Admin嘅我，無力感都好重。 有時候覺得寫嚟寫去都係叫人留意下，唔好打針；又或者可能會打仗，準備下一個求生袋呢d 文章，就諗香港人好可悲。 2019年，我曾經覺得「真係好，香港人終於都醒，唔使再溫水煮蛙到2046先發現事實。」到而家香港真係唔係溫水煮蛙，係滾水煮蛙，但香港人仍然內鬥，真係令我覺得好無力。 我知道，「黃色經濟圈」喺勇武眼中只係生活，唔係抗爭；我亦明白對一分鐘做唔到十下掌上壓嘅和理非銀髮族嚟講，食黃店係盡咗佢哋人事，但香港人可唔可以至少唔好內鬥？Mirror Error係香港文化嘅新瑰寶，就算唔中意，起碼要尊重下。 寫緊呢個Admin專欄時，我有現實識嘅人喺我隔離問我做緊乜，我如實答佢，換嚟一句：「你Channel，都無人睇架啦！」 我知道我唔係高質，但請大家繼續支持所有繼續經營Tg Channels嘅Admins，多d睇多d介紹畀朋友睇唔同嘅Channels，例如赤巴嘅香港歷史台，又例如元朗疾病管制與預防中心，電子連儂牆，各區嘅Channels，本土派Channels等等，都係值得支持嘅Channels嚟，tg 都不乏高質channel。 Tg唔係畀大家搞男女關係，叫雞睇咸濕嘢嘅工具嚟，希望各位可以改善風氣，可以嗎？ 鳩噏完，TLDR：請支持所有Tg channels，係所有Admins嘅動力嚟。 1.0K views23:19
