【講一講有關於財政嘅事】
相信有留意開嘅朋友都見到我哋呢排比較少更新，除咗因為忙於六月⋯都就快變七月號嘅《自由港》之外，我哋都借住呢段時間整理一下目前為止嘅財務狀況，Excel條link喺下面，有興趣嘅可以睇一睇，雖然唔係好詳細，但係總需要俾個交代有捐款嘅朋友。
順便講一講有關支出方面嘅嘢，點解編輯部嘅投稿就得幾百蚊港紙，而漏網手足投稿就一篇差唔多成$100美金呢？首先因為早期資金方面確實唔多，因此唯有對編輯部嘅各位手足刻薄少少，另一方面，流亡海外嘅手足唔少其實佢哋都用緊旅遊簽證滯留他國，或者申請緊政治庇護等緊審批，因住喺呢段時間其實冇辦法工作，因此就好似我哋之前咁講，都希望能夠幫補一下佢哋嘅經濟狀況，所以我哋都盡可能俾多少少。
同時其實有唔少手足並唔擅長寫文章，要佢哋用投稿換稿費確實有少少強人所有，所以後來趁海外有集會，都希望手足可以幫手做直播，當比多一個方法佢哋得到報酬。
未來其實我哋都希望可以有多啲事可以搵手足幫手，例如做採訪、影相等等，睇吓可唔可以有多啲唔同範疇嘅工作俾各位喺海外嘅手足。雖然大家都無經驗，好多時候都會有甩漏，好多嘢都未必做得咁好，不過相信未來會慢慢進步嘅。
最後都係希望各位朋友能夠多多支持，始終我哋都係睇餸食飯，手頭上擁有嘅資源多寡，就影響我哋可以做幾多嘢。
二月至今財務簡報：
https://drive.google.com/file/d/12e5Rrfowa4nd0C2cGaRjNG7WBUtCXg0A/view?usp=sharing
更多資訊，包括最新一期《自由港》請點擊以下連結
https://linktr.ee/HarbourofFreedom
捐款支持我們:https://ko-fi.com/harbour_of_freedom
