【加密貨幣基金會TON Foundation宣佈與騰訊合作：資訊安全問題】 1. 重點一段過：同騰訊合作嘅並非Telegram本身，而係獨立加密貨幣基金會TON Foundation。合作目標在於利用Telegram作為平台起Bots同Mini app（遊戲、支付系統等），同Telegram通訊服務及Self-host bots無關，「存對話送中風險」係無稽之談。話雖如此，無論Telegram等社交平台點發展都好，大家都應該要做好資訊安全，切勿依賴某個平台。（本Channel早年亦有撰寫大量資訊安全懶人包及指南） 2. 詳細：RFA、追新聞等華文媒體近日聲稱Telegram同騰訊合作，並邀請「IT業內人士」警告「有過敏感言論」嘅大家小心Telegram向中國政府妥協。 追查發現唯一來源係美國科技媒體TechCrunch，但文章只有提及「TON Foundation與騰訊合作」同「Telegram有意發展成可以做到支付、叫外賣等功能集一身嘅Super App」，並非Telegram本身同騰訊合作。雖然TON技術由Telegram開發，但由2020年起Telegram就退出咗TON嘅project，由TON Foundation單獨管理。 根據TON Foundation同騰訊嘅合作協議，騰訊主要透過Tencent Cloud同Chainbase支持TON嘅計算強度、Bots同Mini app等服務，並無涉及任何有關Telegram本身嘅通訊服務。 至於有關資安嘅憂慮，有追蹤開本Channel嘅讀者都知道Telegram只有單對單Secret chat係採用E2EE加密，其餘方式同公海無分別，敏感內容需要匿名加密Group chat嘅話應該參考Matrix等protocol。 鑒於各大社交平台發展嘅不可預測性，大家上網時理應無時無刻都要做好資訊安全（VPN、Incognito、防範社交工程等），切勿喺網上裸跑，無一個平台係可以完全保護到自己。 無補充嘅話應該都要好耐先上水一次，勿念 13.1K views18:05
