2020-05-04 04:36:34
暴政 第一課 切莫盲從權威
大部分威權政體（Authoritarianism)嘅權力係人民無條件奉上嘅。喺呢種時刻，人民會預先設想比而家更高壓嘅政府會想要咩，唔等政府開口就主動服從。公民嘅呢種行為，比統治者明白政治權力嘅威能有多大。
「預期性服從」（Anticipatory obedience)係政治悲劇。最初，或者統治者都唔知人民係咪願意喺價值或者信條上讓步，而新政權喺上位之初，或者都未必掌握影響民眾嘅有效方法。
跟住落嚟，要講嘅兩件大事都發生左預期性服從，分別係1932年，德國國會大選後，希特拉得以組織納粹政府：1946年捷克斯洛伐克國會大選共產黨獲勝。
喺呢兩個案例入面，都有好多人自願效忠新領袖，其人數之多，納粹同共產黨因爲咁意識到自己可以因此加快變革嘅腳步，去徹底改變政權（regime change）嘅方向前進。人們最初輕率的服從之舉，最後迎來嘅係無可挽回嘅政治後果。
1938年年初，希特拉喺德國握穩政權，威脅併吞鄰國奧地利。
奧地利總理投降之後，係奧地利民衆民衆的預期性服從決定左國內猶太人嘅命運。當地嘅納粹黨捉住猶太人，逼佢哋洗街，刷走代表奧地利獨立嘅標誌。而至關重要嘅係，其他非納粹嘅奧地利人竟然饒富興致咁喺隔離睇戲。
當握有猶太人嘅財產清單嘅納粹黨徒盡所能去竊取猶太人嘅所有物嘅時候，同樣關鍵嘅一點，就係其他非納粹奧地利人竟然會夥同納粹一齊搜刮財物。
根據政治理論家漢娜.卾爾嘅回憶，當時嘅情況係咁：當德國軍隊進犯奧地利，班非猶太人開始對猶太人打家劫舍嘅時候，奧地利猶太人就紛紛採取自殺手段。
奧地利人喺1938年3月嘅預期性服從，令納粹高層了解到呢個國家原來可以容忍強大嘅暴政。同年八月，阿道夫.艾希曼（Adolf Eichmann）（1）在維也納成立了猶太難民中央辦公室(2)。
同年11月，德國納粹以3月嘅奧地利經驗爲基礎，策劃左一場猶太人大屠殺，後人稱之爲水晶之夜（Kristallnacht）（3）
結果1941年德國入侵蘇聯嘅時候，德國黨衛軍（Schutzstaffel，SS）喺上級未發佈命令嘅時候，就採取左大規模屠殺嘅手段。
佢哋揣摩想要啲咩並展示左自己可以做到乜嘢程度，結果遠遠超出希特拉所料。預期性服從嘅初始面貌，就係依循直覺去適應環境變化，唔去思考自己做緊咩。唔會做呢種事嘅。
唔通得德國人咩？耶魯大學心理學史丹利.米爾格蘭（Stanley Miligram）（4）喺思考納粹暴行嘅時候設計左一個實驗，想要解釋德國人之所以會服從納粹政權做出呢啲行爲，係因爲人類擁有權威性人格（authoritarian personality）（4）。
佢冇辦法獲准喺德國從事呢個實驗，就改喺耶魯大學進行。實驗喺1961年進行，同艾希曼屠殺猶太人而喺耶路撒冷受審嘅時間相當接近。
實驗嘅受試者喺耶魯學生同紐黑文市（New Haven）嘅居民。米爾格蘭話被佢地知呢個實驗係要測試電擊同學習之間嘅關係，請佢哋電擊隔離房嘅參與者（5）。
呢啲「參與者」其實全部都係米爾格蘭請翻嚟嘅演員，並唔會真係被電擊，只會扮到好似受到電擊嘅樣。當受試者撳「電擊」制嘅時候，就會引發以下嘅恐怖情況：呢班佢哋唔識而且無冤無仇嘅陌生人，睇落非常痛苦——大力敲玻璃，話自己嘅心臟好痛。
就算係咁，大多數嘅受試者都係會繼續遵從米爾格蘭嘅指示。依序撳更強電力嘅「電擊」制，直到參與者聽落好似係已經失去生命跡象爲止。就算係冇完成全套「電擊」實驗「殺死」參與者而中途退出嘅受試者，喺離開嘅時候到冇問過隔離房嘅參與者嘅身體情況喺點。
米爾格蘭發現，人類面對新環境同新規則，會變得出乎意料地順從。如果新嘅當權者要求民衆爲左某啲新任務去傷害或者殘殺他人，民衆自願執行嘅程度會高得令人驚訝。
佢回憶話：「我發現高得強烈嘅服從命令傾向，令我認爲根本唔需要再將實驗移師德國重新驗證。」
備註：1.納粹黨委國內（SS）高層，「最終解決方案」嘅主要負責人。該行動以滅絕營等等方式對猶太人執行高效率嘅系統性大屠殺，殺死歐洲地區大概三分之二嘅猶太人。戰後艾希曼喺耶路撒冷受審，漢娜.鄂爾喺書入面評論佢行爲係「平庸的邪惡」。
2.猶太難民中央辦公室（Central Office for Jewish Emigration）係納粹用嚟驅逐領地入面嘅猶太人嘅機構，艾希曼從猶太富人處奪取資金設立，將驅逐猶太人事務統一辦理提高效率。
3.發生喺1938年11月9號，名稱係源於猶太商店同教堂嘅玻璃片喺月光下閃耀住水晶咁嘅光芒。納粹將呢次屠殺偽裝成自發性暴動，摧毀大約七千五百間猶太商店，二百座猶太教堂，約三萬猶太人被捉入集中營。
4.喺崇拜權威嘅同時都恐懼權威，尊敬地位高於自己嘅人嘅同時，壓制地位低於自己嘅人以保持自己嘅優越性。
5.該實驗有受試者(Experimenter)同位於隔壁房嘅學習者(Learner)，仲有引導、督促實驗進行嘅老師(Teacher)角色。受試者聽從老師嘅說明，被告知學習者只要答錯就需要被電擊以示懲罰，且會由老師負起相應嘅責任。
香港歷史頻道：https://t.me/Hkhistory
#暴政 #切莫盲從權威
2.6K views01:36
老
