【義士來鴻】
2016年旺角魚革釋囚義士發仔，於19年11月反送中運動營救理大一役中，不幸再度被捕，還押至今已有一年多。早前發仔在聖誕期間曾經來信，分享在囚近況，相隔數月後他再度執筆，分享失去自由期間所思所想。
************
隨筆：論「勇」
對多數人而言，呢個字絕非陌生。甚至可以話，一直於關鍵時刻中浮起呢個字，所以，當然不會陌生。人在外，固然常有面對呢個字，不過，今次想講嘅，係自內在嘅「勇」，係一種當內在遇到各種情況、疑難時，依然堅持由內而發嘅「勇」，一種活在當下，逼在眉睫依然決定要捍衛尊嚴嘅「勇」。
回憶起過往多年人生，外在成長所遇風雨不多，所得到的歷練確實亦不多。「勇」呢個字，同佢嘅接觸以及對佢嘅理解亦甚為模糊；又或者話，更多時候佢只會出現於電影、電視劇、動漫等等嘅虛構之中，與現世風馬牛不相及。
由內在湧出嘅力，之為「勇」，呢種確實嘅動態流向感受，過往無乜概念，近年卻每每湧現。或者有人會問，人內在唔會有「怯」嘅念頭咩？照常理實會有「怯」嘅念頭㗎噃。相關嘅內在內心掙扎實際上一直浮現。但有陣時，好多嘢，「怯」一下，「退」兩下，「忍」三下，到最後，只會泥足深陷，一發不可收拾。當明白「怯」從來唔係選項之時，理性上就能忠於自身，縱使於陰暗處，亦能由內而「勇」。
「人生於世上有幾多知己，多少友誼能長存」老土嘅歌詞，卻經常細味。歌詞背後，其實又是「孤獨」。細味之下，係多重層次上嘅「孤獨」。齊齊直面各自內在，齊齊忐忑沉思，齊齊心照悶聲嚐苦瓜，齊齊肝膽相照互補不足。真係非片言隻語可盡訴。
最近事態，有所聞。眾人關注者，人之常情悉數理解。無論點都好，正如當初諾言，永不言退。
祈 外在寧 內在安
二零二一年三月十五日
發
https://www.facebook.com/1965117443775378/posts/3051962411757537/
