維城士多頻道

2022-06-21 19:20:01 反送中三週年之際，本店藉此回顧一下各位曾經喺街頭上高舉嘅旗幟。
—
【黑洋紫荊旗】
反送中抗爭象徵之一，不過本店冇賣

最早喺2019年6月10號，文宣組巴打喺連登公佈。意思為黑色洋紫荊 — 香港被毀，但香港人絕對可以令我城重生。五隻花瓣、枯咗兩塊，代表一國兩制五十年，有二十年已經崩壞。

好似雨傘革命轉黃絲帶頭像一樣，大家都照板煮碗，將頭像轉做黑色洋紫荊，但嗰陣時又謠傳轉ICON會觸犯所謂區旗法，呼籲各位唔好再轉，但最後都冇事發生。

而講起「特區抽氣扇」，喺香港示威應該咁耐冇出現過咁滯，因為佢代表嘅係港共政權，並唔係代表我哋香港人，甚至有人認為唔應該用黑洋紫荊，因為佢係抽氣扇嘅改版。

即使係咁，日常生活入面，上網仲仍然有好多香港人用 emoji 嚟代表香港。

而家到目前為止，仍然未能一款大家都有共識代表香港嘅旗，反送中期間，亦好多人設計過新香港旗。

有人認為繼續用返英屬年代嘅香港旗，有人反駁指要民族自強，唔應該再用代表殖民地嘅嘢，就算係英國殖民都係咁話。

有人話用 黃黑旗（又叫光復革命旗），又有人反駁話同香港唔襯，兼似熱狗旗。

有人話用 藍白旗（又叫自由香港旗），又有人反駁話係狗+白衣人，藍色加白色亦都聯想唔到關香港事。

有人話爭乜嘢啫，各花入各眼，一枝國旗，一枝軍旗咪得。

亦有人話得以上全部都代表唔到香港，不了。

#維城士多 打开/如何

2022-06-21 08:21:05 反送中三週年之際，本店藉此回顧一下各位曾經喺街頭上高舉嘅旗幟。
—
【香港獨立旗】
2010年代本土運動冒起後，十年前除咗港英旗重新出現之餘，伴隨嘅仲有示威者開始叫出香港獨立口號。

雨傘革命期間，當時香港大學學生會學苑推出《香港民族 命運自決》嘅專題，其後更推出《 #香港民族論 》 ，引起極大迴響，對於港獨嘅討論越嚟越熾熱。

雨傘革命後，本土派組織林立，香港民族黨 更高舉此刻眾人皆知嘅口號「民族自強，香港獨立」，政權首次引用《社團條例》「裁定」民族黨為非法社團，勒令停止運作。
2016年，以創作宣傳香港本土意識嘅本土工作室發佈香港獨立旗，可惜嘅係，2018年2月本土工作室指因租金壓力，創作收入不足下宣告停運，在休息一段日子後會重新投入創作，但目前為止仍未復業。

反送中期間，不少示威者高舉本土工作室設計嘅香港獨立旗，可惜嘅係並非正版，而係未經本土工作室授權製作嘅複印品。希望終有一日有機會買到本土工作室產品。

另一方面，獨派旗手鄭俠，自十年前一直於遊行高舉自己設計嘅港獨旗幟，由最初被指責「太激進、騎劫、不可能」，到現時香港獨立已成為不少港人心中的唯一出路，海外集會除咗見到光時旗之外，就係港獨旗。

#維城士多
#香港獨立
#香港獨立旗 打开/如何

2022-06-17 22:14:54 反送中三週年之際，本店藉此回顧一下各位曾經喺街頭上高舉嘅旗幟。
—
【英殖香港旗】
今次回顧嘅係喺1959年至1997年代表香港嘅旗。

1997年「回歸」之後，呢枝旗本來已經成為歷史。但隨住港中之間嘅民族矛盾越來越大後，英殖香港旗喺2010年代翻生，諷刺當權者新不如舊，成功刺激中國人民族恥辱嘅痛苦，甚至象徵埋本土抗爭意識。

英殖香港旗開始出現喺七一遊行，反水貨客，反自由行驅蝗等嘅示威場面，喺2013年，港獨組織「香港人優先」更加拎住枝旗行入去中環解放軍軍營。

2019年7月1號，示威者仲將枝旗掛喺立法會主席台前，引起大量國際媒體關注。

另一方面，英殖香港旗仍然有唔少經歷過殖民地時期，親英，崇英嘅香港人用嚟懷緬英國統治，代表佢哋「英藉香港人」嘅身份認同。

佢哋用途同示威者用途背後嘅政治意義非完全一樣。有一段時間，本土派曾經以英殖香港旗作為爭取港獨嘅象徵，造成「一旗多義」、「一旗各表」嘅情況。

2019年，反送中示威者終於有達成共識嘅旗幟—光復旗同獨立旗嘅出現，令往後英殖香港旗喺示威場面出場次數逐漸下降。

因此舉港英旗唔一定等同支持本土派以至港獨派，亦唔一定等同懷緬港英統治，對英國有情意結，喺救生艇計劃之下，英殖香港旗嘅象徵意義或者會再度延伸。 打开/如何

2022-06-16 14:07:31 反送中三週年之際，本店藉此回顧一下各位曾經喺街頭上高舉嘅旗幟。


【光復香港，時代革命】
最初為本土民主前線前發言人梁天琦參選香港立法會新界東地方選區補選嘅競選口號。

2014年雨傘革命抗爭失敗，造就本土派出現。有別於泛民主派主張制度內以「和理非」方式抗爭，向中國政府爭取真普選民主制度。

當時本土派雖然支持普選，但認為實現普選嘅方法首先要取得主權，主張民族自決，香港獨立等。同時支持更激進嘅抗爭模式「以武制暴」，認為以往「和理非」抗爭再不能撼動政權。

本土派當時亦認為香港民主發展一直俾泛民主派耽誤，雨傘革命失敗凸顯泛民抗爭模式毫無作用。甚至追溯至八十年代泛民主張民主回歸，有份造成今日香港局面。
以上嘅分歧，導致2015年起出現泛民與本土派相爭嘅局面。

口號2019年被示威者再次使用，泛民支持者亦開始跟隨示威者使用口號，引申成為反送中革命口號之一。
#維城士多
#光復香港時代革命 打开/如何

2022-06-09 21:03:02 【尋人啟事】
訂單22APR09E003，光復香港旗掛牆兩張寄倫敦溫布萊，Telegram已變成 Deleted Account，請再聊絡我哋 打开/如何

2022-06-09 18:19:10 《維城士多七周年》

2015年6月9號，維城士多喺香港成立，由最初賣旗，然後賣頸巾，賣咗4年之後，估唔到3年前同一日香港爆發革命，更有手足以死明志，完全改變晒大家而家嘅生活，有朋友入獄，有朋友流亡，有朋友移民，連維城士多都會去埋台灣、英國。

咁啱係賣旗嘅我哋，2019年突然多咗好多人識，而我哋銷量上改變，某程度反映咗香港人嘅變化。

英屬香港旗，係早期2015年至2019年的熱賣商品，隨着中共治港壓迫，香港人高舉返以往嘅英殖旗幟，向新殖民者抗議，嗰陣時無乜人賣旗俾人去示威，咁我哋咪賣囉，就係咁促成維城士多開檔。

賣足4年後，我哋推出光復旗同港獨旗，結果港英旗而家變到無乜人買，甚至運到嚟英國都一樣無乜人買。

不過咁樣我哋反而更開心，因為光復獨立成為大家嘅第一選擇，認為呢兩枝旗，更能代表經過呢一場時代革命嘅香港，更加同自己嘅國家相連。

我哋由以往淨係高舉英國殖民旗幟，向中國新殖民者抗議，到而家再高舉埋光復獨立，反映出我哋香港民族意識嘅成長。

自1997年後，我哋不斷面對北方壓迫，未有一刻贏過，內心當然想回到自己熟悉嘅舊世界，英國統治下，一個比現時更有秩序，更講原則嘅世界。

喺強力打壓之下，香港不少人懷有一個可以回到英國統治的夢，但香港民族經歷呢場時代革命後，總要成長，獨立自強。大人喺生活壓迫下會想變返做小朋友好正常，但唔能夠繼續妄想返去以前。

香港民族要實踐莊重自強，繼續喺香港，喺海外，構建香港民族，維繫彼此國民身份認同，不令香港人喺時間中逐漸消亡。

#維城士多 打开/如何

2022-06-08 13:41:56 六月十二日者，香港民族之反抗紀念日也，歷經三年矣，唯未竟全功，苟全性命於英倫。

敝號將南下英京觀展，順道設取貨處，方便已訂貨顧客，先前已訂購，今欲於倫敦取貨者，請Telegram @victoriahk，馬上為閣下當日備貨。

欲購物而當日取貨者，亦無任歡迎。請先TG聯絡訂購、當日交收於倫敦，六月十日挨晚六時截單，逾時不候。

因路途遙遠，當日取貨者，每件貨件酌收車馬費£1，先前已訂購者則可免，敬請原諒。

請注意，因貨量有限，故不設即場售貨，只為訂單留貨，卻購從速。 打开/如何

2022-06-01 21:50:34 【有關前代理收款後失蹤之跟進】

自2月台灣店復業，英國店公司開張3個月以來，本店收到不少投訴指約2021年底起，舊台灣維城士多（下稱前代理）收款後失蹤，至今仍未收貨。

舊台灣維城士多（前代理 aka 前老細 aka 前話事人）於2019年10月，因反送中而流亡台灣嘅抗爭者成立，及後在台灣友人協助下成立「台灣維城士多有限公司」管理，於台灣繼續延續本店業務，而2021年8月保護傘大火事件後，前代理12月決定歇業，目前已正式結束營業，並交棒有意接手嘅台灣手足以及英國手足嘅我哋繼續延續維城士多。

由於當時台灣係用維城士多名義做生意，我哋接捧後不能夠話同佢哋完全無關係。我哋得知佢收款後失蹤後，馬上同佢多番交涉。而對顧客所造成嘅影響，本店深表歉意。
而經多番交涉後，佢願意糾正其錯誤。

若然你曾於以下途徑購物，但至今仍未收貨，已讀不回，不讀不回等，請即聯絡本店跟進，退款或重新寄貨。
victoriastoretw.com 網頁（目前已失效）：
訂單號碼開頭為#，經email發出

Facebook：台灣維城士多

Instagram：victoriastoretw
Telegram：@victoriatw
受影響顧客麻煩請再次聯絡Telegram：@victoriatw
同時聯絡本店Telegram @victoriahk 備案，本店會一同跟進前代理履行退款，寄貨進度。

由於得知顧客苦侯多時，難免失望。本店為表歉意，會於前代理退款或者寄貨後，另外由英國或台灣店再送出旗幟，以作補償，十分抱歉。

英倫維城士多／台灣維城士多
2022年6月1號 打开/如何

2022-05-28 19:42:27 ONE NATION ONE COUNTRY 頸巾

規格 Specifications:

尺寸 Size
19㎝ × 150㎝

材質 Material
100% 亞加力綿

製 Made in
英倫 England

價 Price
£36

有意訂購請TELEGRAM @VICTORIAHK，全球皆可寄送，預計六月尾出貨。

或蒞臨英國經銷商親身選購
Authorised Reseller in the UK
同呼吸 In Common Breath
1st Floor, 35A Ashby Rd, Loughborough LE11 3AA

更多資料請到：
https://victoriastorehk.wordpress.com/portfolio/一國一族頸巾-one-nation-one-country-scarf/


維城士多 VICTORIA STORE
Telegram：@victoriahk

網頁：

www.victoriastorehk.wordpress.com 打开/如何

2022-05-28 19:40:41 MADE IN ENGLAND.

今次係維城士多歷年首件英國製造產品，新一代2.0頸巾比起上一代1.0針織規格、質量、質素亦有别。廠商經已有超過150年服飾製作經驗，歷史悠久，更承接英超各球隊以至世界各球隊官方紀念頸巾，質素備受肯定！ 打开/如何