《上court真係好撚麻煩》之前同親朋友講上完court好攰，朋友都會問點解咁攰呀咪又係坐係到.....
court仔(裁判法院)：每次上court前幾日都要由羅湖過界去大欖，上完court又要去大欖，隔一星期左右再返羅湖
高、地院(高等、區域法院)：直接係羅湖出車去court，完左可以直接返羅湖
真係唔好睇少每次踏出懲教所門口 係有幾煩，無論個日上幾點court，都係5點零就要起身，食完飯就落指模房等searching，係姑娘面前除哂所有衫，踎低起身x3，著返衫。保安會再將所有物品search一次，確保no.係自己，冇拎左人哋嘅嘢。之後就係等等等等等。。。
court仔係煩過高地院好多，因為court仔係由狗去看管我哋，而高地院係懲教直接看管。所以如果court仔褲的話，係懲教除衫search完之後，去到court又要除多次，上完庭再除多次，返到大欖再除，隔幾日返羅湖再除，到左羅湖再除 上一次庭係要重複6次全裸踎低起身嘅searching
court仔嘅lunch都叫食得下，高地院個餐粥真係...衰過豬餿...如果想上高地院嘅手足食得好啲可以10點半前去指定大家樂交錢(手足要提前request)，起碼有餐飽飯食
上完之後就係court等。。。通常最早都要等到5點幾先會有車接返去懲教，返到倉食得飯都7.8點(生理時鐘已經習慣左4點幾食飯)，真係又攰又餓。。。
好唔中意上court但又有少少期待上court 因為終於有望下出面嘅風景，有得見到好多出面嘅人。每次來回車程，都好眼瞓，但都會格硬撐開眼皮 望下條街嘅人同車，因為呢件係一件好奢侈嘅事。
雖然上court好撚麻煩，但聽court都真係好攰 要用上一日既時間，各位旁聽師 送車師想同你地講返句辛苦曬。
Aromafairy
