2022年交易想進步，應該點做？ 新一年新開始，相信不少朋友既願 | 跟著L去賺錢

2022年交易想進步，應該點做？

新一年新開始，相信不少朋友既願望都係2022年投資回報可以比上年更進步。我可以肯定2022年將會係非常難玩既一年，一定唔會好似2020同2021年咁樣可以無腦贏。今年市場資金將會大幅減少，機構投資者取態會變得相對謹慎，唔會再好似之前咁乜都亂買搞到乜都亂升，所以將會係非常考功力既一年。

我見到愈來愈多朋友都開始認真學習投資，真係開始睇書研究，呢件係一件好事，但當然呢個只係一個開始，唔好以為睇幾本書就可以做到長期賺到錢，睇我果張書單既書只係令你開始明白市場實際係點運作，例如令你唔會再咁傻豬豬以為見到panic sell就應該即刻撈底，climax run就應該即刻高追。書中既知識可以令你知道唔同情況背後實際係咩原因導致，可以有咩唔同策略應對。但實際上你既性格，可以花在交易上既時間，風險接受水平都會影響到邊d策略對你嚟講最有效，你必須係實戰中才能找到最適合自己既方法。有好多朋友睇完d書覺得好有用，都會請我提議更多既書俾佢地睇，雖然有呢個好學既心態係一件好事，但我想講的是，睇更更更多既書，學更更更多既理論，多數既結果只會令你績效更退步，輸錢輸得更快（相信有不少比較資深的朋友都有深刻感受）。你應該專注係自己覺得自己最信服，應用上來最舒服既理論同策略，而唔係去追求“最好最完美”既方法。書單上面既書已經提供左足夠多方法俾你參考應用，你明白了之後就應該先大量實踐，到真係發現全部方法都不適合自己先再搵其他方法。

你可能會覺得奇怪，不是學愈多知識，對市場愈了解，識得愈多策略，就愈容易贏錢嗎？呢個對學習好多學術科目嚟講係的，但交易卻完全不是這樣。你會發現好多成功既投資者，都只會專注專研係一個方法上，不會一時一樣，例如Warren Buffett永遠就係做價值投資，Mark Minervini永遠就係做動能投資等等（更多的例子，可以參考Jack D. Schwager果5本Market Wizards系列），佢地永遠都帶有自己強烈既風格，永遠都堅持自己既一套，無論其他人講咩佢地都唔會理，因為佢地知道自己個方法係可以令自己最舒服地拎到alpha，只要一直堅持地做就可以長期盈利。

交易有很多理論，很多成功既交易者都有自己一套對市場理解的觀點，而好多時唔同既理論、唔同投資者既觀點往往係完全矛盾，互不相容，當你學完一套理論再學另一套理論時，往往就會發現很多格格不入的地方。舉一個簡單例子，有很多人提倡不要time the market，跌市時分注撈底，買入優質資產就可以，因為你唔會估到底係邊，幾時到底；但亦有很多人提倡你必須要time the market，你應該等到市場出現某d見底訊號先可以出手買入。分注撈底，average down係非常危險，你愈跌愈買很容易一鋪清袋，永不翻身。兩派都會提出大量例子證明自己果派係work，人地果派係唔work，結果你好容易就會企左係度，到真係大跌市時就唔知道應該用邊一個方法先係“正確”。

其實兩派都可以係正確，只係前提假設不同，兩派各自都有優點同缺點，至於你適合用邊一種方法，就只有你先可以知道。你要考慮自己信服邊一套假設，自己捱價時既心理狀態，自己有幾多資金，可以抵受幾多最大回撤等等，呢d都係因人而異，冇對所有人都“正確”既答案，如果你捱10％價已經會潮熱汗出，腰酸頭暈，心煩失眠，脾氣變差，咁你就需要太太口服液咁就係代表分注撈底唔適合你。當你學習交易理論時，應該focus on邊d野啱自己，而唔係focus on邊d野係“客觀真理”，好多方法只要運用正確都係正期望值，可以長期賺到錢，並不存在什麼交易聖杯，問題係你有沒有信心去堅持。要知道每一個交易方法都有自己既限制，不會適合所有的市況，所以就算個方法有正期望值，都必然會出現有連續輸好多次既情況，呢個時候好多人就會懷疑人生，放棄個方法去尋找其他“更好”既方法。呢度我想講少少數學，其實就算一個勝率高達60％既交易方法，係500次交易當中，都必然會有連續輸5次的情況，呢個已經係假設所有交易係互相獨立既最理想情況，事實上由於交易係互有關連，係好容易有連輸超過8次既情況，所以多次連輸係非常正常，因為機率而來既波動，但好多人一遇到連輸，都會錯誤以為係個方法出左問題，需要學習新既方法。而事實上，一個交易方法如果原理上係正確，其實係不需要太多改變的，就好似一百多年前既Wyckoff係股票上有關大戶操作既理論，到而家應用係加密貨幣市場上都冇任何需要改變既地方。

係新一年之始，我建議你可以回顧番你過去幾年學習過既交易方法，再睇番你實際交易時用邊d方法有正期望值，自己覺得最舒服，最有信心，然後係今年再精進呢d方法，發展出自己既交易系統、交易風格。盡早離開不斷睇書，不斷上堂，不斷找“最好既方法”呢個死胡同，放棄一些人地講到好好，但自己用極都係不順手既方法，相信你今年既成績將大幅進步。