去到十月十三日，我人生最距離死亡既日子，當日我好記得係落雨，我 | R.S International

去到十月十三日，我人生最距離死亡既日子，當日我好記得係落雨，我地搵左好多機會都搵唔到機會用手頭上既火魔，直到最後我地去左旺角狗屋門口到掉火魔，係我掉完我手頭上既火魔之後，我轉身諗住離開，點知我後腦就中左一發橡膠子彈，個人黑左mon幾秒鐘，醒番發現我啲隊友已經跑走哂，當時我仲要係唔知自己中左彈，但其實依個位我唔係最灰，因為由細到大我比人賣慣隊友所以無乜特別感受。

係我摸到我個頭後面濕同埋好似有個窿之後我開始發現有啲唔對路，隻腳開始都跑唔郁，結果我係狗屋門口爬下跑下去到聯合廣場後面有條樓梯門口，我先大叫fa,佢地有4個衝左入黎幫我止血，止左大約十五分鐘左右，佢地話送我去醫院，當時有好多新聞係講送左去醫院就會比人落charge,所以我同佢地講左句，一係你殺左我，一係繼續止血。止到半個鐘既時候佢地開始話我止唔到，咁樣會死，我聽到依句既時候，淨係想打比當時對我好重要果三個女人，結果無一個聽，依個先係我最灰既原因，我係當時屠龍個gp到講我頭中左彈，得james佢飛過黎搵我，陪我去搵醫生聯針。

當日我就有左PTSD,我兩日夾埋只係訓得三個鐘，開始食安眠藥，有一日食左三粒半都訓唔到，仲要朝早7點，我就走左去買左酒，點知原來會好大獲，我開始斷片，斷左大約十二個鐘左右，我醒番係訓左係一個隊友大脾（仔黎）。我聽我朋友講番先知，原來當時我喊到仆街，仲發哂癲咁，一癲就癲左十二個鐘，但醒番之後我PTSD都無埋，不幸中既大幸。

係之後黃振強開左個育龍channel,可以用果個channel既人，係我地屠龍入面，可以用既就只有佢，佢仲同我地講，啲錢係留番我地走既時候用。

後面大家都知道我地係蘋果做左個訪問，依樣野比人屌到依家，但我想講既有兩點，首先蘋果並唔係我地自己去聯絡，而係佢地透過我地身邊既人去問我地可唔可以幫我地做個專訪，所以唔成立話我地想出名所以去做，我地係出左名先接受採訪。其次就係我地當時同果篇專訪既topic一樣，只係想多啲香港人醒覺，片中入面係咁叫人捐錢果個係李家田。