R.S International

2021-07-13 16:50:06 但我只係離開左一個星期，隊內部已經有野煩埋我，當時有個前隊友，用我地屠龍個名r左1萬番黎，結果佢代左5千，依個亦都係我番隊既原因，但我開始唔想做隊長依個角色，因為其實做得依個位，等於背負住全隊人條命，任何一個決定都會害死人，依個係我做黑社會果三年學到既野。

去到十月一日國殤日，我地依然選擇左係荃灣既戰場，但一開始我地係某酒店對面馬路換gear既時候，當我地換完，諗住行出去既時候，有架狗車跑過，有其中一個人帶左一部分既成員跑走，不過因為仲係打緊杖，所以我地當時無即刻內控但我地開始感覺到越黎越吃力，係最前既人越黎越少，反而full gear企係後面既人越黎越多，當時我6800條帶仲要斷左，結果我射tg既時候跑番去後面搵fa洗眼，好番又跑番上前線，來來回回咁好多次。但其實同我出去係一件好慘既事，因為好多奇怪既事都會發生係我身上，例如比狗追追下會甩鞋帶，或者無啦啦落單，仲往往落左係啲危險既區域，依啲我就唔提啦，比你地笑下就算。

當10月1日之後，我地嘈過一次交，我亦都做埋我做隊長最後既任務，就係將一半人踢出team,因為當時我隊既成員心理都開始好大壓力，情緒開始唔穩定，加上跑走果班比另一班扑狗車既人開始係隊入面審判咁既款，跑走果班又開始不滿另一班人既做法所以我請左佢地離開，但我請離開既果班先係一開始同我出生入死既人，係佢地走左之後我都算係萬念俱灰。結果我自願比黃振強騎劫左隊屠龍，但因為屠龍係我創既，開始同結束我都諗住一路係度。 打开/如何

2021-07-13 16:45:07 係8月17號，我地當日認識既人，提議左樣野，就係話佢有個信得過既手足想入隊，亦都可以提供gear比我地，結果黎左三個人，其中兩個就係黃振強同李家田，如果大家有留意我地案情既，應該會知道佢地係邊個，我亦都唔多加解釋，黃振強帶左廿個左右既6800同一箱60926,雖然未見到佢地既時候我地好多都驚佢係鬼黎，但當佢供左gear比我地之後就無諗咁多。

去到8月18日，我地成班出左cwb之後去左金鐘，結果係食白果，當時我仲諗，無事好過有事既。

去到我等左好耐既8月25日，荃葵青大遊行，我地當時都full team上陣，細節野就唔講，正路好多人都知，825我地做過咩，咁我講個趣聞比大家聽，因為我隻右眼視網膜係變左形，個病叫做圓錐角膜，所以係睇唔到野，再加上一開頭係場運動射tg既時間，我係無任何保護既裝備，所以我成日會捽眼，加深左個問題，結果果一日，係退入大鴻輝既時候，我係最後走既果個，我見到有班著住黑衫既物體，以為係自己友，點知係我就跑到同佢地會合既時候有兩個記者捉住我，話果班係狗黎，我先無繼續衝過去。果日亦都係依場運動第一槍既實彈槍，我地成隊當時都貼左粉紅色label,當晚係連登比人話係鬼，我有嘗試回應過，但可惜網絡世界真係唔係我一個人可以回應得哂，所以我直頭quit左連登佢，我唔想有野擾亂到我情緒波動，上得場，個情緒唔穩定好易出事。

825之後，我地由一星期出一次，變到部份成員連平日都出埋黎守連儂牆，有幾晚我啲隊友仲守通頂，就係果時我開始發現，我啲隊友越黎越倚賴我，係9月中我離開左屠龍。 打开/如何

2021-07-13 16:40:06 就係咁，我一次比一次傷，但我都無卻步到，我同我另外一個識左都成十年既兄弟講，單拖都唔係辦法，我不嬲都中二病，熟我既人都知，所以我就話要有個朵，型啲。而我兄弟果陣已經睇緊件單車甲，果陣以為神器黎，後尾發現乜用都無。

跟住我仲係tg到識多左兩個人，當時8月5佢地都有份同我出，所以屠龍一開頭有4個人，8月12號仲有二坡坊玻璃樽大戰，我地幾個都有出席，果日我都差啲脫唔到險，因為啲狗出黎果陣，開始跑，結果我走左入一個停車場入面，仲要因為夜晚啲lift鎖哂，得番一個出入口，結果我匿埋左係，保安啲休息室入面，嚇死幫我mon post果條友，不過都逃過左一劫。

跟住過左幾日（實際上係邊日唔記得，但一定係818前既事黎）係出去之前我係長康m記有個藍絲，我地幾個同佢有口角，佢仲打左個唔關事既路人，我不才，比佢用鎖匙插穿左頭皮，不過皮外傷黎。當時中環有個集會，但傳聞又話鄉黑會係荃灣地鐵站伏擊人，所以有人係荃灣罷工討論區到吹雞，集合地點係德華街公園，當時我同上面講果幾個人一齊無諗係咪鬼就出左去，結果見到一班人大約廿個左右，點知狗車就到，我地廿幾個就開始跑，果刻我地先知比人fake左，開始同班狗展開左追逐戰，我地由德華街公園跑左去上千色店上面既天橋，班狗已經係我地下面一路追住，我地一直跑，跑到去荃豐中心外面果條走廊，因為當時荃豐已經閂咗門，但班狗已經係哂千色店門口，仲用電筒照住我地個方向，我地一啲人痞低行一啲人爬住行，唔夠膽突個頭出去，直到我地去到綠楊新邨個公園先算安全，但當時我個頭仲係咁流血，好彩現場有個fa幫我止血，到班狗開始散既時候，我地都開始落番地鐵站，但依然都係等唔到班鄉黑出黎，我地最後成班交換左tg,亦都開左group,之後打算一齊行動，屠龍就係咁樣成左形。 打开/如何

2021-07-13 16:35:05 8月3號，我係自己一個出左去尖沙咀，狗都未見到，我就見到有條友屌緊啲拆欄杆既人，我當時同佢距離比較近，我仲衝埋去諗住打鳩佢，點知我一衝，後面一班人都衝過黎，我已經起左腳，我仲諗，我開左佢頭波，後面成班人會唔會打死佢，結果我收唔切，踢左落佢下面踩緊既果架平行車到，當時我跛住咁番左屋企，想上床訓教既時候，因係我訓上格床，痛到上唔到，打左999,結果入左醫院。去到全港大三罷，因為當時我仲係荃灣罷工討論區既其中一個admin,我係tg見到好多對話，我忍唔到，我同左個姑娘講，我落樓下食煙，偷走左番屋企。

當我出到去既時候，我隻腳仲係跛下跛下，但我都係由荃灣行到葵芳，有人當時仲帶風向話去荔枝角，點知我又on99跟左過去，當我去到荔枝角既時候，就有人係channel同啲group係度講，有鄉黑出左黎，我岩岩唔記得交代番，我出黎既契機係因為721,我個諗法好簡單，香港政府出黑社會，咪由我依啲過左氣既黑社會出黎對付番，正所謂竹門對竹門，木門對木門。

係果班鄉黑斬到有位手足一地血之前，我係荃灣南豐中心諗住走既時候，我仲換埋白色衫，點知透過我黑社會既網絡收到風，班鄉黑諗住做野，有片話佢地集緊人，我連衫都唔記得換，就同埋我班fd過去，當我地由南豐移動到二坡坊既中途，我地遇到好多手足，我亦都叫我啲朋友去邀請佢地一齊去睇下二坡坊咩事，當我地去到既時候，果位手足已經比人斬到一地血，其他手足仲去追果班鄉黑，結果淨係捉到兩個，第一個比人捉到既，佢入左連唐樓既樓梯，但比其他手足捉住左，佢後抗，但走唔到亦都扯唔到佢出黎，但當時我唔知點解個個手上面都有架撐，得我赤手空拳，我自己衝左入去同佢打，點知我比後面果班手足扑到好金，仲比人扯埋出黎，我講話自己友先停手。 打开/如何