今日喺昆士蘭有組織直接衝擊泛民，去集會踩場、當面對質，從前呢啲 | 拿破崙777世［無日程表］

今日喺昆士蘭有組織直接衝擊泛民，去集會踩場、當面對質，從前呢啲嘢肯定唔係罕有。曾幾何時，拒絕同埋質疑政治精英指揮，自己人決定返自己人嘅命運，呢啲係常識，但係今日做啲咁嘅嘢時唔知點解已經變咗奢侈。

Repower 英國612搞市集，固然可恥。VR體驗抗爭現場、一家大細篤住魚蛋燒賣祭祀亡魂，呢一啲行為出自一個發李嘉誠夢嘅財閥其實絕對唔意外，但係我見大家最意外嘅係乜嘢呢？係其他嘅社運精英拒絕批評，成班裙腳仔淨係識得玩政治，最多都係收埋收埋篤下背脊批評下。

新制度已經變咗新常態，大家又去返被圈養嘅生活，只係角色同埋背景唔同咗。

市集呢件事可能你好嬲，但係唔好嬲錯嘢，要正視問題，你嬲嘅唔係個市集嘅形式，而係策劃呢啲紀念後面嘅操盤人。

今次嘅倫敦事件只係一個微小嘅病徵，背後係一個更大嘅問題——社運系統嘅官僚只會互相包庇。就算個個包裝紙唔同，但你一睇個成份表就知根本係一樣。你喺我個董事會我喺你個董事會，你出席我嘅嘢我去你嘅嘢，利益同瓜葛已經深到一個點係大家唔可以冇咗大家。為錢好，為權力好，現實就係政治明星最得益嘅就係保持現狀。就算會打情罵俏都係因為分餅仔分得唔均勻。

退後一萬步，如果你真係咁睇唔過眼嘉年華賀國殤，請你唔好得個講字，用行動去彰顯你嘅理念。

如果社運精英反應唔切，只會係因為佢哋要得到上級批准，請示中央。佢哋只會打口水戰，係因為佢同你、我唔同，佢哋有嘅係後面成個官僚體系嘅掣肘。

所以，不如實際去現場質問Ivan同所有嘉賓。

一個鐘車程就可以實現到，依家係英國時間朝頭早，你哋可以自決。

既然資本家唔肯講獨立，就去現場show俾資本家口中嘅淺黃睇你哋需要革命定紀念集會。

呢個唔係建議，係真正嘅社運，屬於海外社運，如果最後淪為普通集會，劉祖迪港援等等你哋只會淪為六四一樣嘅支聯會。

如果你哋有頭有面唔肯提倡，唔肯帶頭去行動，其他在場參與集會嘅人都應該去，唔好因為話浪費金錢，你2019年都冇抱怨過付出金錢，你依家嚟屌一個鐘車程同個少少錢車費？今日612唔做，我哋嘅公民社會就一沉百踩，你要話俾沈旭暉知海外建立公民社會就係咁樣實現，唔係靠研討會，你哋唔去，你哋只係助紂為虐，同2019喺屋企睇直播嘅人冇分別，展覽係留俾真正冇時間嘅人去睇，集會係應該轉化成為行動。

如果最後唔成事，就唔係得Hayes此處冇革命，係英國冇革命。

612一年得一日，你地成日講勇氣，612唔係為咗今日嘅紀念而誕生，612係代表人民終於行動，推翻腐敗嘅官僚制度。要回應練老所講嘅政治歧視，就唔該去現場。如果你哋全部人都有睇《時代革命》一定會記得Nobody現場質問中大校長段狗段崇智，你哋去英國係為咗安逸，去個冇乜生命危險嘅集會圍爐，定試下真正落手去改善最多資源但頭腦唔清晰嘅同路人？除非你哋一個二個本身只係想捉鬼，淨係滿足於捉鬼。

言論壓力係一時，現場群眾壓力先係一世，你諗下點解當初你會由網上屌幾句變咗街頭抗爭。

六四晚會搞咗30年即係對中共係零威脅性，成日乜乜柒柒啟示，最大嘅啟示就係你搞多30年612集會展覽公民社會研討會都係零威脅性，你睇下西藏人依家淨係講抖音抗爭，連講反攻西藏都懶得講，你哋要連結嘅係革命分子，唔係社運分子。

我相信和平即淡忘，你睇下外國啲呀婆點屌啲後生人嬉皮笑臉地講納粹大屠殺。以前行catwalk做model為場運動make noise完全冇問題，但2022年依家繼續做2019嘅文宣，唔好話乜撚嘢文化獨立，香港獨立唔係靠文化，更加唔係靠陶醉文化情懷。大佬啊人死咗先要悼念，香港仲有幾多人係活生生喺度過緊日子，你哋而家已經講緊點樣留種，根本就係將生人活埋，將革命家活埋，然後標榜此處有團結，此處有良知。

為咗革命兩個字，反抗過香港殖民政府，今日同樣為咗呢兩個字，我會去反抗呢一個退步主義嘅「新香港政府」。同以前一樣，等一日就係少一日，反抗行動同埋籌備今日就要開始。

我哋前線見證着2014雨革嘅衰落，2016魚革嘅衰落，而唯獨2019一直冇結束過，如果今日我哋唔重新掌握話語權，咁就係正式結束，一切嘅結束。

- 元旦女勇武

影片提供 @hkpaceqld

@hongkongvaliantspeaks