「建議成立：香港街坊時事論壇」「 議政 與 風險 取得平衡」「非正 | 香港民主自由資訊目錄

「建議成立：香港街坊時事論壇」「 議政 與 風險 取得平衡」「非正式、平民化、唔好formal、議員都要係街坊身份」「做到少少野好過乜都唔做」

做區議員就係從政，從政者討論政治議題係天經地義既責任與義務。如果區議員唔夠膽參與政治討論，不如退位搵過第二份工，做番個普通市民。

我地唔可以一退再退，連基本既底線都放棄。就算普通市民都有權利去公開討論政治，從政者唔可以議政，真係極度荒謬，絕對不可以屈服接受。

但係現實D講，正式既「議政平台」可能會引起國安法關注，以此作為DQ議員藉口。

畢竟香港係一個無法無天既極權專制社會，我地唔可以用正常道理去睇問題，必需要在「議政」與「風險」中取得平衡。

建議將「議政平台」非正式化，變成「香港街坊時事論壇」，將平台既政治意味減低。主辦單位輪流邀請非建制議員（主要）、社運人士、時事KOL、黃絲街坊去參與論壇，進行非正式既時事議題/社會大事 既討論，類似擴大版既城市論壇。

論壇可以避免一D太過敏感既野，例如：港獨、反共、國安法....但係可以討論具爭議既議題，例如：明日大嶼、警察暴力、洗腦教育、公共財政開支....

總之唔好搞到好formal，唔好變成正式會議咁樣。論壇過程中唔需要書面記錄、唔需要做決議，或者投票等正式程序，單純提供一個空間，每次二三十個人，參與者固定時間輪流發言，用「街坊身份」去深入探討各項社會議題，讓社會大眾了解值得關注既事情，唔會比政府、紅媒洗腦。

「香港街坊時事論壇」最理想就係實體形式既論壇，但係疫情既關係，政府一定會派出狗狗加以阻撓。即使唔得（多數），可以考慮用網絡去搞，成本也可以大大降低。

所有人都係街坊身份：參與者即使大部份係議員，都係用街坊身份去參加論壇，所有言論只代表該市民既個人意見。（大家心照，民選議員講既野梗係有代表性，但係唔需要講到明）

每次人數：至少二三十個區議員，如果人數太少，就會變成電台節目，缺乏代表性。

非成員制：擴大版城市論壇，每次邀請幾十個區議員做發言嘉賓，佢地之間唔係組織成員關係

「如果人大照樣DQ咁點算？」

中共都唔需要講道理，鐘意做咩我地都無方法阻止，我地做好本份就算。中共一向都好痴線，佢要搞我地根本點都會搞，我地已經退無可退。

最緊要起做左個頭，之後先有機會發大搞，用較保守既方法去做，保障參加者安全。

拋磚引玉，希望各位議員手足可以參考一下，香港人加油。