2021-05-07 09:51:21
「民族自強」— 邊度先係香港人嘅「祖國」？
民族自強嘅口號，曾經喺街頭上彼此呼應。但係香港民族幾時先做到真正嘅民族自強？
自英治時期嘅香港旗（港英旗）大概喺2010年起，開始喺不同社運場合出現，作為一種本土意識抬頭、對抗大中華主義嘅一種象徵，維城士多當年亦喺呢個氛圍底下誕生。
而香港旗嘅重現造就咗一股戀殖情懷，神化英治時期嘅香港，開始叫英國做「大英祖國」，有一段時間更興起香港回歸英國嘅討論。但歷史上，英國同中國一樣，都係殖民香港。
2019年嘅暴政打壓、白色恐怖彌漫下，催生出香港民族意識，作為我哋一種新嘅政治信仰：令世界知道，我哋係香港民族，我哋就係要決定自己嘅政治命運。
而英國作為香港前殖民者，已經成為過去式，英殖香港嘅歷史固然要緊記，但目前港英戀殖情懷，崇拜英國嘅氛圍不但沒有減退，反而更為熾熱，不少人以英國人身份自居。
另一方面，一部分香港人仍然抱有大中華思想，將「中華民國」當成自己祖國，仍然想像台灣仲係「正統中國」。
當新聞報道台灣將護照上嘅Republic of China縮到納米咁細、中華航空嘅英文China Airlines 打算改名做Taiwan Airlines，台灣政府逐步撇清昔日嘅歷史殘渣、加強台灣主體意識時，香港人會普遍支持台灣。
但出現有關兩岸統一、「一個中國原則」等新聞時，香港人又會普遍支持「中華民國」先係中國，會話共匪竊國、中國民國先係真正中國，支持中華民國光復芝麻。喺雙十節嘅時候，又有好多香港人話係真正嘅國慶日，將中華民國當成自己祖國。
而上述嘅兩班人共通點，普遍係聽到我哋心中嘅宏願時會嗤之以鼻，而係主張香港回歸英國、中華民國，成為英國海外屬土，中華民國香港。無奈暫時香港民族性唔夠強，理想嘅係香港人會為自己嘅民族著想，唔需要再去附庸其他國家。清楚自己唔係英屬香港人，英國人、中華民國人。劃分到香港民族不同之處。而唔係繼續將英國，中華民國當成「祖國」，而將香港作為自己真正嘅Homeland 。
1.6K views06:51
維
