2022-04-06 16:37:20
#Admin專欄 #做法不完美但可接受可以再改善 #願榮光歸香港 @Windseasonbro
『做法不完美，但可接受，可以再改善。』2019年不割蓆嘅精神，喺2022年嘅今日顯然消失。
事源係最近發生嘅兩件事，第一件事係『願榮光歸香港』作曲人DGX THOMAS同『時代革命』導演周冠威為咗三萬文而爭執。兩人各執一詞，且因為兩人說法各有支持者，本來已經元氣大傷嘅黃圈一時之間分化得好嚴重；而第二件事係王喜喺臺灣撩鼻時，被護士撩爆個鼻，投降時反而引起港臺之爭。
呢兩件事，姑勿論誰對誰錯，容我Quote返早十年班左膠最中意講嘅『共產黨最開心』，因為我真係好快就收到認識嘅藍絲廢老追到好貼咁Send一大堆『黑暴头子为钱反目』、『王喜入境台湾流血无理取闹，港独台独狗咬狗骨』......
以前『共產黨最開心』呢句係派膠，而家呢個係事實。風巴認為，港臺唇齒相依，雖然未算朋友，但唔應該係敵人。
王喜一事，我認為臺灣檢測嘅護士用力過度。喺王喜嘅角度，被撩爆個鼻流晒血咁，佢認為至少都應該有個名有個交代，否則根據正常索陪程序，都變得苦無證據；而臺灣人則覺得香港人小提大做，香港人嘅投訴文化從來都唔係臺灣嘅主流。
其實係文化衝突，王喜無錯，臺灣人嘅反感亦稱唔上『錯』。
大家香港人要諗下，臺灣呢幾年受過香港好多屎———首先大嘢就梗係陳同佳同小草呢兩個殺人犯；次要係搞亂人哋酒店、喺舖頭偷嘢等等新腥港人甚至香港人嘅所作所為，有臺灣人認為『香港人都係中国人』，實在無可厚非。
網路上，不知幾多中国人放大港臺之爭，除咗論壇，網路遊戲甚至手機遊戲亦有好多分化兩地嘅五毛運作咗好耐。
再睇返『願榮光歸香港三萬文事件』，有手足指因為風波，而對『願榮光歸香港』反感，甚至有人話：『一早覺得首歌唔好聽』、『唔代表香港』云云。
其實呢種極端立場先行嘅思想方式好撚危險。首先，2019年香港人選擇Endorse呢首歌作為抗爭主流歌係事實，以『國歌』嚟定義呢首歌，對香港人嘅意義顯而易見。
2019年聽到會感動到喊嘅歌，今日點解會『一早覺得首歌唔好聽』？唔係話唔畀唔中意呢首歌，只係有感當中除咗有五毛從中挑撥之外，有更多人係意氣用事，Discredit呢首歌嘅民族價值。
亦有人指，『時代革命』嘅導演周冠威及其團隊都有問題，喺早期鼓勵散落各國各地嘅香港人手足社區放映『時代革命』，而喺無幾耐之後，反而賣畀發行商，發行商喺各地戲院以較便宜價錢播映『時代革命』，令小本經營嘅社區放映嘅手足要蝕本收場。
對於以上種種，且容風巴 @Windseasonbro 講一句：『做法不完美，但可接受，可以再改善。』2019年嘅道理，我相信冷氣軍師、黃店、哨兵、和理非、勇武派、甚至我認為死去嘅彥霖、梓樂，所有香港人都有講過。
講係好容易，但做係好困難。
做法不完美，問問自己邊個人無做錯過？我亦都做錯過好多嘢，但我哋身為香港人，係唔係一定要對自己人咁Harsh?
如果大家對『利益』完全不可接受的話，你哋唔明白『政治』，就係不斷嘅『利益分配』，強如美國亦要考慮到盟國利益，小如非洲小國，亦要了解身邊國家唔同利益，『Winwin雙贏』唔係某国贏兩次，而係確實地考慮友好嘅利益。
政治就係如此。
喺我眼中，『時代革命』團隊同DGX都唔係人血饅頭最極端嘅Case，而佢哋亦有某程度上嘅付出，只係見利反目，令人更加悲傷。
我深信，如果佢哋選擇眾籌，喺2022年嘅今日，亦不乏捐錢當抗爭贖罪券嘅人，我認為佢哋比較似『藝術家性格』發作，欲以『作品有價有市』嚟滿足自己心靈。
我並唔認同佢哋嘅做法，亦理解如某D PM我嘅手足指，『監就手足坐，光環同錢就佢哋拎』，呢個我好明白，亦無奈現時情況下，香港人根本就無辦法為定罪嘅人彌補人生及金錢上嘅損失。
2019年至今，無數個暴動定罪嘅手足、浮上水面嘅黑衣浮屍、死因不明嘅陳彥霖周梓樂、中鎗嘅熊仔餅、梁凌杰為首嘅一眾以死相諫者、揮刀自殺嘅梁健輝等等等人(篇幅所限，恕省略)。相信我同你、DGX THOMAS、周冠威導演都唔想見到佢哋受到不公義對待。
我唔認為DGX THOMAS作曲、周冠威導演拍時代革命係只係為錢。
喺葵廣黃店店員被襲擊嘅2022年；
喺重有黃店被針對，狂派599G罰單嘅2022年；
喺重有手足新暴動Cases定罪嘅2022年；
喺重有醫護被指黑醫護，冒住生命危險及萬夫所指但仍然守住嘅2022年；
喺李加超準備繼任柒婆，成為深圳南香港小區之首嘅2022年；
香港人重要內鬥嗎？
『做法不完美，但可接受，可以再改善。』
未必可接受，可以再改善。
共勉之。
我仍然希望煲底見大家。
312 views13:37
F
