2021-06-21 03:05:37
Repost • ig @fergus.lfw .
《致觀龍》
各位街坊：
你哋睇到呢段文字之際，我已經正式辭去中西區區議會觀龍選區議員嘅職務。
自去年七月喺立法會選舉中被取消資格後，我已知道自己極大機會無法完成4年嘅任期。不過為咗回報各位街坊對我嘅信任，我曾公開承諾服務觀龍至「最後一刻」。二月二十六日嘅「死亡來電」，以及後來嘅羈押，令所有計劃都被打斷。收押期間，我未有放棄觀龍。每日打開報紙，我都會留意有冇同本區有關嘅新聞，憂心有冇區內大廈有確診個案（之前薄扶林道Gym Room大爆發嗰陣真心驚）；留意有冇區內餐廳申請新酒牌；細讀每個同中西區有關嘅城規會或者地政諮詢公告。我有嘗試過透過團隊去繼續服務街坊同執行議員職務。然而，獄中只能透過每日十五分鐘嘅探訪時間以及有嚴重遲延嘅書信同外界溝通，根本無法即時同有效咁跟進區內事務，亦未能親自同街坊會面，聆聽各位嘅陳情。儘管唔甘心，但都必需承認還押已令我無法履行區議員嘅職責。我不欲做一位「不存在嘅區議員」，眼前只有辭職一個選擇，望各位街坊諒解。
入獄前我曾經翻閱競選區議會嘅傳單，上面有唔少政綱同計劃喺短期內都無法落實，甚至未有機會提出，未開始已經結束，而部分我正在跟進嘅社區議題都好可能無疾而終，對此我深感抱歉。無法完成各位街坊授權我嘅四年任期，將成為我終生嘅遺憾，但能夠喺動盪年代之中得到各位街坊嘅信任及支持，並喺呢段路上同行，我雖有憾，但無悔。我畢生都會以曾擔任本屆中西區區議會議員，以及香港人嘅民意代表為榮。不辭而別並非我嘅作風，無論嗰日係幾時，我都幻想過喺任期最後一日，喺辦事處搞個大食會，同貓貓們一齊招呼大家，與民同樂。作為區議員生涯嘅卒業式，我亦會返去第一次同大家見面嘅堅尼地城站C出口，用議員身分擺最後一次街站，好好答謝每位支持過、幫助過，或者冇支持過，甚至憎我恨我嘅街坊。奈何天意弄人，我連同街坊親身道別嘅機會都被剝奪，但願呢封獄中書簡能夠將我嘅心情同諗法傳達俾大家。
我唔係土生土長嘅觀龍人或者西環友，直至成年後先因為入讀港大而踏足此地。數年間感受到嘅鄰里之情，以及觀察到嘅社區肌理，都係我呢個於新界私人屋苑長大嘅人心中留下深刻印象，亦令我注定愛上呢個位於維多利亞城西端嘅社區。四月二十三日，我因為火眼實驗室限聚令嘅案件被押到東區裁判法院應訊，囚車離開荔枝角收押所後穿過西隧，帶我翻到闊別咗兩個月嘅中西區。縱使因角度問題，見唔到觀龍樓或者百看不厭嘅堅尼地城海傍，只能望到已被封鎖嘅Instagram Pier，我內心依然非常激動。囚車之後再經過當日被罰告票嘅中山紀念公園體育館、守望住母校港大嘅中山像、昔日開區議會嘅海港政府大樓。一瞬間，求學時嘅片段、同街坊相處嘅點滴、與同事們為街坊社區奮鬥嘅片段猶如走馬燈嘅記憶湧上心頭。我相信呢一種係思念嘅感覺，係我對呢個投放咗大量心血同充滿回憶、腳毛嘅社區嘅思念。呢一程車令我確定我唔只係觀龍嘅過客，就算下次再翻嚟已經唔係區議員，或者係好多年之後，我仍會以觀龍人同西環友嘅身分自居，並引以為傲。
同其他議員同事相比，無疑我服務社區嘅經驗較淺，亦欠缺豐厚嘅資源。但我係個幸運嘅人，沿路上有好多人嘅扶持同幫助。自區議會選舉起，一直有好多街坊主動向我伸出援手，為我惡補觀龍同西環嘅歷史；發掘一啲我都未必察覺到嘅社區問題；分享佢哋以往服務社區嘅經驗。若果冇一班街坊無條件嘅支持同照顧，相信我未必有動力堅持至今，好多事亦必定做到手忙腳亂、倒瀉籮蟹。路上除咗街坊，亦有區議會嘅13位民主派同事，同你哋共事，我獲益良多。或許過去一年喺某啲議題同處事方式上有唔同嘅睇法，但慶幸我哋仍能互相尊重，亦知道彼此都係出於好嘅動機。無論係服務社區嘅經驗，抑或係議事嘅技巧同態度，我一直視各位為榜樣，從大家身上默默學習。我希望特別鳴謝區議會主席King姐，感謝你對我哋一班新同事嘅關顧，以及尊重新一代嘅諗法。我眼中嘅你係一個勇敢同和藹嘅母親，期盼你往後一切平安。
喺可預見嘅將來，我同我嘅團隊都唔會有機會再以區議員嘅身分服務各位街坊，亦相信政府唔會急於為我留下嘅空缺進行補選，意味住觀龍區將有一段時間冇民選嘅區議員服務，希望各位街坊能夠好好照顧自己。喺如此年代，每個人都要行多一步，抓緊身邊每一個公共領域，將彼此連繫起嚟。法團、業委會、居民協會都要人！
此刻已經坐咗上看台嘅我無資格叫大家做啲咩或者唔好做啲咩，但我希望大家要先照顧好自己。失意、失落嘅時候，吞一粒神奇的糊塗魔藥，咁先有力繼續往天飛，再去遁地。
有緣再見。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Btw，Fergus最近決定開個Patreon Page，分享在囚生活以及紀錄香港嘅點滴，希望大家可以多多支持。
//2019年後，我哋以「真係好撚鍾意香港」嚟表達對呢個城市嘅情感。即使作為一個共同體，我哋鍾意嘅「香港」都會因為個人經驗同價值分歧而不一致。
從貓到足球，從香港紀錄到在囚生活，我哋希望透過書寫生活中不同嘅點滴，記錄低我哋想「留住」嘅香港，我哋想「留低」嘅香港，「我哋想留下嘅香港」。//
Patreon傳送門: www.patreon.com/ferguslfw
399 views00:05
守
